Kas iti uleg nga aguyas ti biag.
Iti kettat ti panagngatangata ken buteng
iti rapiki dagiti bala, tadem iti tadem
lasag iti lasag, agsayasay ti dara
ni marigrigat kas iti panagbusi ti rungsot
iti ngiwat ti kanion iti Datu Piang.
Ngem ta maipalagip ti agdama
kas iti masakbayan:
ti Zinundungan ken Marag
iti pakasaritaan ti Namulandayan
dagiti natiltil a biag iti talon
kas iti duag ken balitang
dagiti mapadso nga anges
iti nagan ti palso a kappia iti sardam
kas iti arubayan nga aradasen
dagiti mannakigubat a balikas
wenno arog ti diktador
a kenkuana ti tamed dagiti muyong
kas iti panagsambuambo dagiti turog
nga agballiodong.
Awan nagbalbaliwan daytoy a pakasaritaan
ti puli kas iti ginnasanggasatan
iti kampilan wenno iti palasio
wenno iti kalsada dagiti ir-iruken a rigat.
Anansata dagiti udleng a tured
managbabainda piman
iti padaya dagiti manglanglangan
nga ayat iti ili a nakaipasngayan
dagiti amin a pannakamurmuray
iti murdong ti ramay ken bibig
sa iti utek a no manglipat
kaarigna ti pannangan a nagabay:
mairanud ti boksit a ngem ta
agtalinaed nga agnanayon ti saraaw
kadagiti bigao ken iti bukel ti pagay
a maani kadagiti aldaw nga agam-amangaw.
Kasano nga agparbeng dagiti rabii
a mangar-aradas kadagiti bigat iti Maguindanao?
Napananen dagiti datu ti daniw a nalinteg
kadagiti bannawag nga agbettak kadagiti bambantay
kas iti tagainep dagiti langit a malmalday?
Iti banwa kas iti ili kas iti pagilian
kas iti ing-ingungoten
a pagsurnadan ti iliw ken labon iti panganan:
sadinno ti beddeng ti panungpalan
dagiti karayo iti kastoy a madagdagullit a dangadang?
Ikkaten ti itta iti eppes kas iti ladawan
nga iti isem iti agmatuon dagiti arapaap
ket iti taltalon a matersiaan.
Sagawisisan ti angin iti naumbi a wagas,
kas man mangar-arem iti kigaw a gasat.
A Solver Agcaoili
Hon, HI
Agosto 30/08
No comments:
Post a Comment