Tallo gasut a pisos ti kasukat ti anges
iti lungon a puraw. Dayta ti kuna ti ina,
kakibinna ti saning-i ken ti ikkis ti megaphone.
Iti likudan ket ti agbanbantay a nakamassayag
a darepdep ti idudur-as iti Abu Dhabi
iti bendision ti langis ken doliar
wenno ti amo nga agpagunggan.
Ngem a ta kuna met ti rekruter:
iti ngato a nagtapuak tapno iti distansia
ti kaawan kaasi ket ti pannakaisalbar.
Ania a riweng, ania nga alingget
ania a panagkurri ti aliaw
iti panaginnala ti bangabanga
iti semento a datar? Agluksaw
kadi met dagiti anghel, rugianda
ti agdung-aw tapno kadagiti karayan
ti lua ket maugasan ti pannakapilaw?
Apay ngamin nga umadayo
dagiti kas kadatayo
tapno iti karsel dagiti anniniwan
ket pabaludtayo kadagiti am-amangaw
dagiti senador nga agiyawid iti nitso
wenno babantot tapno iti koro
dagiti ina nga agsapul iti kinalinteg
ket bumangon ta agmurmuray
dagiti rurog ti pannakapaay?
Tallo gasut ti kasukat ti biag
ti anakko, kuna ti ina
iti baet dagiti saibbek.
Agkuppit ti barukong
agpiangpiang ti langit
kadagitoy nga aldaw
iti agsisipungtuan a panagsangpet
dagiti darepdep a naidasay.
Hustisia ti birokek, saan a lungon.
Kalintegan ti dawatek saan a limos.
Anian a nagkas-ang dagitoy:
iti ballasiw-taaw nga agbirok
iti biag, sadiay met laeng
ti kanibusanan dagiti dardarepdep
a linglingay. Iti sabali a bangir,
agsoltero ti lungon iti suli
agsaksi kadagiti sabali pay
a pannakaudatal dagiti katay.
A Solver Agcaoili
Hon, HI/ Agosto 30, 2008
No comments:
Post a Comment