IS THERE ROOM AT THE INN? A family displaced by the fierceness of the MILF raids certainly hopes so. They knock on the door of a total stranger to ask for shelter from a shop owner in Iligan City on Tuesday night. At press time, 15,000 evacuees are occupying the Iligan City National High School, the City Central School and the West Central School in Buruun. E. Bacasmas, Inquirer, Aug. 20, 2008
Isu met la nga isu daytoy a buya:
ti mababain a panagkatok iti estranghero
a ridaw iti rabii a managpabus-oy ti didigra.
Sangapangen a kinadaksanggasat ti awit,
tuktoken ti ama ti siririkep a taeng dagiti marabutit
tapno dagiti silaw ket agpiangpiang
kadagiti pangal ti agdan dagiti kusit.
Awan ta awan agpastrek iti rabii
dagiti balenbales. Ta kasano ti mangiwa
iti teltel tapno isina iti tengnged
ken iti arapaap a nasarikedked
nga iti ili nga agtalinaed? Ngem ta gudasen
dagiti igam nga agbusi kadagiti maustel nga anges.
Sirigen ti ina ti sangapirit a lawag
iti rekkang dagiti agpasangbay a bakud
a no agsao ket pasig a pangngadua iti pagilian
dagiti birkog, iti man sanikua wenno binatog.
Kabakbaked dagitoy dagiti mangriro
a diskurso dagiti soldado ken kabusor:
dagiti tangke nga agkudaap iti tengnga't aldaw
dagiti karbin a ti ngudo ket agmasinggan
iti ambalsamado nga ayat.
Dagiti ubbing nga iti sipnget agbilangda
iti ranggas, agaddakami-apoda met kas iti saltek
kas iti beggang a kaarngi ti anak-ti-sal-it
a no mangrakattot ket uray ti naidasay agkulagtit.
Agkatangkatang iti tunggal ili dagitoy a padas
kas kadagiti umili. Ditay ammo ti patingga
dagiti amin nga oremosbobiskum nga iti abrakadabra
dagiti agmatuom ket namak pay a manglanglanggong!
A Solver Agcaoili
Honolulu, HI
Agosto 20/08
No comments:
Post a Comment