agiyula ti dadapilan ti mannaniw
iti bennal, sapal, tagainep ti kalti
wenno pulitipot, tagapulot koma
iti tammudo a mangkiki iti raramanan
ngem sugpet ti rummuar
iti ayusan a mapan iti sinublan:
dua a mannurat ti puli
nagsaganad a nagsubli
iti naggapuan, iti tapok kas iti angin
ti sapri iti nalagalaga a diding
agingga nga iti laengen lagip
ti pakakitaan iti nagapuanan
saan nga umdas ti daniw
wenno ti panangpatpatiray-ok
kadagiti mangrabrabii
iti kastoy a pasamak
a, ngem ania ngarud ti kalak-aman
dagiti balikas no di ti panangited
iti kararag, pananguros a kas ipabalon
iti sabali manen a panagdaliasat
a naratibo ti sumuno a panagsisinnarak
kadagiti maintar-intar nga unas
maisubo iti dadapilan ti mannaniw
a kabulon ti kararag: immortal koma
dagiti amin a pumusay
isuda nga agputot iti segga
ti mail-ila nga ayat
iti dadapilan kas iti basi
ken ti mayatang a tedted ti arak
sangaprasko a yar-arit
iti ibit dagiti agar-arikap
iti maulila a ragragsak
A Solver Agcaoili
Hon, HI/Oct 13-08
No comments:
Post a Comment