Dumteng a kas alikuno dagitoy a rikna.
Pananglanglangit amin ket adayo dagiti ulep
Iti saritaan, ti buridek iti ungto ti linia,
Siak iti tengnga dagiti arapaap nga iti maysa
Nga aldaw ket saanton nga ikabesa
Dagiti mataengan a ramay
Dagiti numero a mail-ila.
Kastoykami nga immadayo.
Asideg kadakami dagiti rikna a makadunggiar,
Masugat uray laeng ti punial ti anil-il
Dagiti ubbing a pinanawan tapno kadagiti bulbuloden
A segundo dagiti panagkikinnablaaw,
Kadagiti man an-anusan a panggedan wenno
Iti agsansaning-i nga uluanan
Ket andingayenda datao
Tapno mabilangmi ti kaipapanan
Daytoy a 'naktisal-it a panagtalapuagaw.
Sanantek laeng ti kasingin ti banang-es.
Ania ngarud ket ditay met saosao a senador
Wenno durubo a diputado
Tapno koma makurimes dagiti amin
A kabaelan nga ibulsa wenno birkogen
Kas iti isem ti arapaap iti mabigatan a masakbayan
Tapno iti parbangon dagiti panagsagrap iti parabur
Di agulser ti komedor a mangur-uray iti basbas.
Iti kadarrato a maipalapayag ti idadateng ti bagyo
Wenno tudo a mangiyeg layus
Wenno kimat a mangpatubo
Kadagiti mannagadu a tagainep,
Panunoten a nalaing:
Adda kadi dagiti an-anib iti sagumaymay
Tapno masukal ti kaawan iti sibay dagiti annak
Nga iti agsasaruno a saltek ket agur-uray?
A Solver Agcaoili
Hon, HI/Sept 30/08
No comments:
Post a Comment