Siak, iti Pagilian Dagiti Maskara

Mask Exotica. A street dancer adjusts his intricate mask shortly before the opening ceremony of the 29^th Masskara Festival, which has earned for Bacolod the title “City of Smiles.” R. Zamora, Inquirer, Oct. 2, 2008

Dagullitentayo dagiti pasamak

Kas iti sariugma: am-ampog a di mamingga

Ti kastoy a pannakilantip iti ayab

Ti kalsada kas iti tinawen nga agbuybuya

Mangtingiting no kasano nga ikinni ti bagi a mabisin

Ti tulang nga uray la agkutukot iti ut-ot

Ta adda ngudo ti imuko iti bain a mangkolor iti rupa

Ken iti lusiaw a kudil, maris ni ay-ay.

Dakami a mamirmiraut ti agpabuya.

Ipakitami ti pammarpardaya dagiti panawen

Ken ti rikur kadagiti amin nga estoria

A saan a dakami ti bannuar wenno arkanghel.

 

Aramiden ti umuna wagas

Ti panangipakni kadagiti amin a pagkurangan

 A babak iti man kada danapeg dagiti mautoyan

A saka wenno kadagiti luppo nga agpiskel

Ti bukot a mauma nga agkumpas iti dugudugdog

Dugudugdog ti gimbal nga idi un-unana ket patigmaan

Dagiti agpapauyo a gasat. Kasta met ditoy

Bacolod dagiti amin a panagidiayami

Kadagiti lukong ti palad tapno kadagiti urit 

Ti agur-uray nga ima

Ket mabirokanmi dagiti mansanas, kastanias, ken ubas

Kas iti isem iti laksid ti limdo ken ling-et

Amin dagitoy a tagilako itatta iti kakastoy

A panagsisinnarak dagiti agragut a makalipat

A kas kaniak, iti daytoy nga agmatuon 

Dagiti aglabonlabon nga arapaap ti punsion

Dagiti innapuy nga agrigrigat.

 

Siak, tarimaanaek bassit ti akkub dagiti dagensen:

Dagiti maris ti saning-i ket iti nalabaga a nayurit

Manipud iti tengnged agingga iti puso.

Ti asul ket ti immakulada a kararag

Tapno iti sakaanan ti naganak a Virgen

Ket ti misterio dagiti amin a padas

Kas iti panagpanaas ti rusok, amin a maris

Nga ikutan ti pangilinged iti rupa

Tapno kadagiti kolor ket ti parabur iti sangapada

Maibando kas kadagiti aldaw,

Maidagup kadagiti mabugiaw a malmalanga.

 Iplastarko ti apput ti ngiwat tapno diak

Makasao, diak maipalnaad ti pudno

Kadagiti kalsada nga addaan iti bibig

Ken lapayag ken mata. Awan patinggana ti kastoy

A pabuya ti kinamalas. Sandi ti rigat

Dagitoy a pananingiyentablado iti pia

Kas iti karadkad. Itay, sakbay ti yuulog

Iti aglaladut nga agdan, pinatiray-okak

Ti pinggan: impusiposko nga impauddog

Ayatko la a masukal ti agkabannuag a bisin

Kadagiti kalkulado nga askaw. 

Namak pay a makusbo datao,

Matalimudaw bayat ti panagpandanggo

Iti kainaran dagiti agbuybuya a mata

A kas met iti di mamakawan nga aldaw.

 

Isu a palugodandak nga ipuestok manen daytoy

A sallukob dagiti amin a pangta ti panawen

Kas iti pannakipagili: agkumpasak iti dugudog

Dugudugdog ti mapatit a tambor iti pammati a mabugiaw

Dagiti di met mapadso a kabusor:

Kadagiti dulang a malmalday kas kadagiti bulsa

Iti daytoy mayentablado a pabuya. 

 

Hon, HI

Oct 2/08