DALDALLOT TI PANAGKALKALLAUTANG
(Sinurat para iti ‘Talkback with Dr Agcaoili”, ‘Olelo Channel.
World premiere on August 31, 2009.)
Narration:
Ipeksa daytoy a daldallot, ti maysa kadagiti kadaanan a forma ti oral a literature dagiti Ilokano, ti narativo ti panagkalkallautang wenno ipapan iti ballasiw-taaw. Iyebkas daytoy a daldallot ti rigat ti iyaadayo iti daga a nakaiyanakan ken ti rekisito ti panagkarkarappet ken Apo Daga tapno mabaelan ti panangabaruanan.
UMUNA NGA AKTO: FIRST SEGMENT
Tata Rizal
A ta dallot duminidallang
Ta daldallot duminidallang
Kakabsat a sangapada
Kumablaawkami ita
Palugodandak koma
Mangibunannag sarita
Pakasaritaan panangpanaw
Daga ti ar-araraw
A ta dallot duminidallang
Ta daldallot duminidallang
Nana Fely
A ta dallot duminidallang
Ta daldallot duminidallang
Kadakayo ti kablaaw
Oras a naimbag iti kalgaw
Adtoyak a mangibaga
Pakasaritaan a naiwawa
Immadayo iti ili
Tapno mapan sabali
A ta dallot duminidallang
Ta daldallot duminidallang
Tata Rizal
Dakami nga immadayo
Dakami ti nagkapuyo
Nagbirok iti siping
Nagmalanga iti angin
Aldaw rabiikami a nagbannog
Nagbirok iti talibagok
Ta idi panawen ti rigat
Ti bengkag di agbukat
Di mangted bendision
Pangsilpo komat’ balon
A ta ti rigat ket sabali
Agkiraos tian, agmadi
Isu nga iti adayo
Kakabsat ida a dungngo
Isu nga iti adayo
Nasumok nga agkarayo
Nana Fely
Ta kasano koma
A biroken ti pia
Karadkad inaldaw
No banga ket kawaw
Ngarud masapul tured
Agbirok sarikedked
Uray no umadayo
Mapan iti adayo
Mapan iti sabali
Daga sabali nga ili
Idiay nga agbirok
Bagas a maipisok
Tata Rizal
Ket ta ania ngarud
Agalibtak , manigud
Ta iti kasta agbannog
Pangkontrat’ palab-og
Bisin ken kiraos
Di pay makadiram-os
Isu ngarud a manigud
Iti kasta ket di maisagud
Isu ngarud nga immadayo
Kadagiti walang a nagian
Nagan-anus iti tudo
Nagtrabahot’ bengkagan
MAIKADUA NGA AKTO: SECOND SEGMENT
Nana Fely
Iti Hawaii a nasumok
Iti rigat a nasubok
Kasingin lat’ an-anus
Maiparit ti badus
Ta ania ngarud
No di agagawa a sigsigud
Awan no kuat’ malamut
Awan maaramid a paridusdos
Tata Rizal
Bay-andak ngarud koma
A mangisarita, kakadua
Mangiyebkas iti padas
Adu a rigat panagtalakias
Iti Hawaii a dinanonan
Saan met a doliar lattan
Adu a sakrifisio, sanaang
Adu a puyat, leddaang
Ta ania ngarud ket immadayo
Iti ili nga ammo simmuko
Tapno sabali nga ili agbiag
Agbirok maisakmol binigat
Nana Fely
Kastoy ti pakasaritaak
Ditoy nga estado immayak
Siak a naggapu iti Bacarra
Iti ili dagiti naemma
Ditoy nga immayak
Tapno makigasanggasat
Ditoy a naisadsad
Agbirok iti pagbiag
Idi damo ket narigat
Idi damo ket agluluaak
Ti rabii ket kaatag
Ti liday a kagasat
Tata Rizal
Iti taltalon a nagubra
Kadagiti ima a nagbanag
Nagbannog a nagagawa
Tapno kasta ket agbiag
Kasta met laeng ditoy
Iti Hawaii at nagsangladak
Adu a panagpabus-oy
Iti nakisang a pirak
Ngem iti anus nga adu
Makagin-awa met tao
Makakitat’ panagdur-as
Uray iti rigat a padpadas
Nana Fely
Denggenyo ti saritak
Siak nga anak ti daliasat
Siak nga immay iti adayo
Naisadsad sabali a puro
Kastoy man ti masaritak
No adda anus, adda ragsak
Kastoy man ti maibagak
No adda nam-ay adda rigat
Ngarud kastoy ti makunak
Ditoy Hawaii adda arapaap
Ditoy nga adda ti pamsaak
Panagballigi iti adu a rigat
Tata Rizal
A ta dallot duminidallang
Kastoy man ti saritaan
Ditoy Hawaii a nagkamangan
Adu met ti pakasaritaan
Adu dagiti masursuro
Adu dagiti maikulbo
Ta kadagiti walangwalang
Adu met dagiti mangmang
No ngarud ta dika agsiput
Biagmo ti maiyilbut
Mabatika a nakakaasi
Mabatika a mabibbibi
Nana Fely
A ta dallot a duminidillang
Isarunotay man nga iwanwan
Isarita nga ilawlawag
Dagiti pasamak panagbiag
Panagbiag iti Hawaii
A kadagiti aldaw ket naunday
Ngarud denggentay man
Ti adu a pagadalan
Ti panagbaniaga ditoy
Adu a pulkok, pannakautoy
Adu a kararag rabii
Kabulig ti pagpakaasi
A Solver Agcaoili
Hon, HI/Agosto 30, 2009
No comments:
Post a Comment