If only curses could kill those bastards in the government. Ramon Tulfo, Inquirer, Sept. 29, 2009
Isu met laeng nga isu a rikna
ket unget ken balikas:
ti panaganaktisal-it kadagiti sinalbag
a malalaki a kadagiti ngiwatda
ket ti agbusi a kinapalangguad
iti panagaramid iti naimbag
uray iti panawen ti delubio dagiti gasat
nga iyanud ti layus kadagiti karayan
ti kinadaksanggasat.
Kas ita, iti daytoy a kapitulo ni Ondoy
nga iti biagtayo ket bersikulo ti tarukoy
datayo a kadagiti ig-igid laeng nga agur-uray
iti panagsangpet kadagiti saranay
idinto a dagiti dadakkel a lames
kas kadagiti artista ken annak dagiti bakes
ket ti agtaray-buagit a lantsa
para iti ipatpateg. Saan, saan a patas
dagiti buya ti layus kas iti pabuya
dagiti biag a maan-anud!
Sabali ti pannapadso dagiti marigrigat.
Sabali ti pannaipatli dagiti addaan iti gasat.
Sabali ti ipupusay dagiti awanan.
Sabali met ti pannakatay dagiti aglablabonan.
Kadagiti estoria ti didigra ket ti estoria
ti kinapimpiman dagiti agkamata iti panagtagiuray
isuda a mabati a kadagiti salakan
a di maikari mabati nga agbuybuya.
Siudadanoak iti ili a kastoy
kas idi punganay agingana ita:
kas idi punganay dagiti amin a bagio
a kadagiti sagumbi makikabbalay
kas iti apokalipsis ti linak
a kadagiti arubayan pumanaw.
Isu ngarud a pasaransanan
ti mangiballatek iti nabiag a sao
tapno dagiti di manangngaasi
sumukoda iti alinuno.
A. Solver Agcaoili/Manoa/Sept 29, 2009
No comments:
Post a Comment