Pannakabukel ti TMI Global

Maipakaammo met ti pannakabukel ti TMI Global a pagsisinnarakan dagiti amin a mannurat nga Ilokano iti intero a lubong, uray no sadino a sulinek.



Kas iti TMI America, ti pannakaitandudo ti Literatura Ilokana ti kaskenan a panggep ti TMI Global.



Rakraken ti TMI Global dagiti beddeng iti utek, iti heograpia, iti naggapuan a tribo wenno away wenno ili wenno probinsia wenno pagadalan wenno ania man ditan a konsepto a mangwarawara kadagiti mannurat nga Ilokano.



Ketdi, ipapilit ti TMI Global ti pannakarebba dagiti amin a pader ken beddeng ti panagsurat nangnangruna no dagiti ikurkur-it ket pakaseknan ti LI.



Ditoy a mabalabala--kas met laeng iti pannakabalabala dagiti muhon a konsepto iti TMI America--dagiti kapampanunotan maipapan iti kinaasinno ni Ilokano, maipapan iti lengguahe ni Ilokano, maipapan iti kultural a praktisna, maipapan iti padasna a kas makikappeng iti maysa nga etnolingguistik a grupo.



Adu dagiti muhon a konsepto a pangrugian ti maysa diskurso maipapan iti global a padas ni Ilokano.



Ipangpangruna ti TMI Global ti pannakabigbig kadagiti gapuanan ni Ilokano iti benneg ti panagsuratan ken kaarngi a kultural a praktis.



Ala, dumaw-askayo pay ngarud.



A. S. Agcaoili

4 comments:

rva said...

daytoy man! ala man, mang ariel. daytoy siguron 'tay nabayagen nga ur-urayentay a grupo wenno gunglo a mamagkakamang ken mamagkayammet kadatayo amin iti maymaysa a panggep ken praktis, datayo itan manipud iti nadumaduma a paset ken dimension ti lubong, actual man wenno virtual, residente man wenno exilo, ket awan itan ti estranghero iti maysanmaysa.

agbiag ti TMI Global!

joel said...

makapagagar daytoy, Manong! globalen ti idea, experiensia, ni Ilokano. wen a ta global met ti residensiana. makapagagar a talaga!

Ka Iddo said...

ngaruden...addaak iti likudanyo, apo! mapaglobal man, mapa-earth man wenno mapa-world man, no napintas ti panggep isu nga isu a napintas!

tira ngarud... no adda proyektoyo a ket ibarsakyo kaniak ngarud ta imbag la nga iseksek iti kolum iti pagiwarnak, hehehe!

ariel said...

Wen, ipantay ngaruden a rikna, apo!