Barangabang

Barangabang. ti panangikabil wenno panangkalub iti nakapudpudot a dapo wenno sibebeggang a beggang wenno panangiyasideg iti apuy tapno pabaraen wenno ipapudot wenno lutuen ti maysa a makan iti wagas a mabayag, in-inut, ken kasla manglinlinay.

Antigo daytoy a rikna.

Derrep kadagiti apuy
wenno beggang
wenno aminen a kita ti temtem
wenno paginudo wenno atong
ket iti sellang ti agpatnag,
ditoy nga agindeg ti rugso
dagiti ridaw a marikpan
dagiti papag nga agsala
dagiti bagi nga agkumpas
dagiti anges nga agadda nga agawan.

Residente ni ayat kadagiti rekkang ti dakulap.

Residente ni ayat kadagiti rikki
dagiti di aglunit a sugat.

Residente ni ayat kadagiti bara iti piditpidit
wenno lammin kadagiti ima
wenno kutukot kadagiti ubing a tumeng
wenno ti panagdanum amin a regta.

Agtibbayo ta agtibbayo ti barukong
ket marba amin a kastilio a darat
kadagiti kapanagan ti agragut a rikna.

Ti tangsit iti kinaagkabannuag, a, awan
maaramidam no kidagennaka
ti buteng iti pannakakitam ti musam
ket iti panagbugsot dagiti tagainepmo
idiayam lattan ti pannakadusam:
anges iti anges ngem
pus-ong iti pus-ong.



Uray matayak, kunam.

Sangaribu ket maysa a pannakaidasay
la ketdi ta ti palludipmo
ket matagikuak
bukbukodak.

Ulsak daytoy iti agpatnag
ket diak paturogen
ket duakami a manguray
iti aguttog a bannawag.

Kas iti dalluyon wenno layus
wenno allawig a narungsot
no ruk-atam ti rikna
no ibulosmo kadagiti kabakiran
wenno wayawayaam
kadagiti kataltalonan:
agbugi nga agbugi dagiti sardam
agmandi dagiti tektek dagiti saltek
matnag dagiti kutsara a di masagid
matnag dagiti tinidor a di maaprosan
wenno ti kakaasi a pusa, manglanlana
nga aguray iti kartaang.

Kalay-aten ti residente ni ayat
amin a bessang,
iti man sulinek dagiti essem
wenno iti purok ti pagbabakalan.

Nabileg ti balikas ti sellang.

Ari ti balikas iti amin nga ari:
itundanaka iti pakatayam
tapno agbiagka, agungarkanto
kalpasan ti panangidayyeng iti samiweng
kalpasan ti buribor ti ulo
ti kankanayon a sairo dagiti dakulap
wenno barukong wenno pulso
wenno dagiti bibig
nga agbirbirok iti sabali pay.

Wenno tay aggurigor a kulding,
kas iti panangkulding
ti mannamay iti kantaridas,
wenno ti babato, wenno ti anting-anting
ti O Apomi nga Kitingkiting,
daytay krusmo nga agbibitin.

Iti puso nga agindeg ni ayat,
iti ayat a mainaw ti sabali pay nga ayat
iti sirkulo nga awanan keltay.

A Solver Agcaoili
UH Manoa/2007