Araraw

Araraw

Mannakabalin a daydayawenmi
Nangisagut iti anges ken biagmi
Sika a managayat unay a taklinmi
Sika a mangbasbasbas kadakami

Iti daytoy a panagtitiponmi
Sika a taklin ti tallaongmi
Awatem kad’ daytoy a datonmi
Awatem kad’ daytoy ararawmi

Ta sika’t taraon bagi ken kararuami
Ta sika ti punganay ti karadkadmi
Pagyamanmi amin dagitoy a sagutmi
Ti awan ressat a panakaibalballaetmi

Sika ngarud ita, mannakabalinmi
Mangnaynayon iti kabaelanmi
Ipaaymo kadakam’ ti talna
Ipaaymo kadakam’ ti kappia

Idatonmi kenka daytoy a ramrambak
Iti imatangmo isagutmi a siraragsak
Awatenmi kadi a kas panagsubad
Panagtamedmi aklonen kas surnad

Ita itedmo kadakam’ ti pamendision
Dakami a makidanggay iti punsion
Itedmo kadakam’ ti sudi ti nakem
Ken kinatarnaw ti amin a gagem

Ta sika a mannakabalin amin
Sika ta sika laeng daytay taklin
Iti panagwarsimi iti sagrado nga asin
Amin a madi a riknami ket iwalin

Ta sika mannakabalin-amin
Sika ta sika laeng ti taklin
Iti panagwarsimi kadaytoy a bagas
Yadayonakam’ amin iti kinaranggas.

Daytoy a panagkakammaysami bensionam
Nasayaat a panagkakadua itedmo kadakam’
Sika ta sikat’ Mannakabalin-amin
Sika ta sikat’ tungpal ti panagngilin

Iti nagan ngarud ti maysa ken maysa
Ti bendisionmo iburaymi a sangapada
Iti kasta ket mataginayon manipud ita
Ti ar-ararawmi nga ayat manipud kenka


(NOTES: Written by A Solver Agcaoili for the 2007 Drama and Videofest, Ilokano Program, UH Manoa, Nov 14, 2007. With this ar-araraw, Ilokano students taking up IP 411: Ilokano Literature in Translation/English and Ilokano 401: Fourth Year Ilokano will form a group to do the araraw ritual that requires the performance of the 'panagwarsi iti bagas ken asin' and the chanting of the araraw herein reproduced).

A S Agcaoili
Nov 14/07
UH Manoa