(Ken Ka Lydia Abajo Quides, kadua iti tignayan ti kontra iti kinaranggas iti taeng ken mangiruprupir iti kalintegan dagiti babbai a maidaddadanes ditoy Hawai'i)
Dumawatka kaniak iti verso
ket itedko kenka ti paulo ti daniw.
Idulinko iti panunot dagiti kakas-angan
a padas ket iduayyak ti isem.
Kastoy ti aramidtayo amin,
datayo a pimmanaw
datayo a binaras ti bangungot
a sagut ti ili kadagiti amin nga agdawat
iti ugaw wenno makidilot iti ayat
wenno mangipadigo iti panagragut
ti lasag iti sabali pay a lasag
kas kasingin dagiti amin a liday.
Wenno salaknib kadagiti agmironmiron
a kinadaksanggasat.
Adda ranggas kadagiti balikas, kabsat,
ken ti arrabis dagiti agmalem a pananggudas
dagiti kalsada iti pigsa wenno saririt
wenno kakaisuna laeng a kinatakneng
anian ta iti riaw a mangwaknit
iti agmarmaraisem a langit a kunam a nalimpio,
nalinak kas iti lubong dagiti nakamassayag
nga arapaap, adda ditoy nga agindeg
ti maduadua a panungpalan ti agdadata a kapay-an
dagiti busel nga itayyetayyek ti angin:
agbalin dagitoy a lulua ita ken idi kalman.
Narigat met ngamin ti panagungar iti ballasiw
dagiti adayo a makabiag a sao para kadagiti exilo:
datayo dagiti pagsangladan dagiti sayangguseng
nga agariwawa, kas iti Sao idi ugma,
iti henesis dagiti agsampaga a sabong
santo met laeng aglaylay kadagiti uluanan
dagiti pimmusay a ragragsak
wenno maris iti mata uray no agsisiim
ti adalem a rabii nga agpagungga
iti patpatiray-ok ti nagabay nga agsapa.
Datayo nga immadayo ket agpalpalama
a kankanayon iti kaasi ta kasta ngarud ti banag
dagiti gasat nga impabus-oytayo
kadagiti dingnguen iti ili, dagitay
man agsambuambo a bulbulitor
kas iti presidente ti kusit
kas iti diputado dagiti dagensen iti barukong
gapu kadagiti di agsusurot a kassaba
para kadagiti malmalday
para kadagiti mamirmiraut nga altar
para kadagiti nagawan a no mabirokan
ket awananen iti rupa, lasag, tulang
wenno kabaelan a mangidayyeng iti "Pamulinawen"
wenno aminen nga ayug ti puli.
Saan a kas karina ti panangisagut
iti paulo ti daniw a nakalemmeng iti barukong.
Manglaglagip ti pluma
kas iti atang a naikari iti panagmalmalanga
tapno maiyayab ti panaglak-amtay amin,
amin, mairaman dagiti bulding, pilay, sul-ot
ken ti nasantelmo a daniw iti namarmarna nga agmatuon.
A Solver Agcaoili
UH Manoa/Nob 25, 2007
No comments:
Post a Comment