(Naidaniw iti Diversity Matters Week, University of Hawai'i at Manoa, Marso 10, 2008. Kasta met a naidaniw ti versionna iti Ingles. Kadua a nangidaniw ni James Ramos, estudiante iti Ilokano iti nasao met laeng nga Universidad.)
Ragsak ti maris ti bullalayaw
Kadagiti tanap iti lukat a barukong
Ti nagwaknit a langit
A ditoy nga agindeg, agtalinaed
Ti katkatawa dagiti naliday a bantay,
Agsisilpoda a tumannawag
Kadagiti pangen ti tumatayab
Nga iti panaglayagda iti kumarkarit a kontento a law-ang
Ket datayo met amin, datayo a pimmanaw
Kadagiti naliday a baybay ken ladingit
Timmalikud kadagiti amin a kinaawan kinalinteg
Iti man bilangbilangen a grasia ti makan
Iti man bilangbilangen a grasia ti langit
Tapno ditoy, iti barukong ti umis-isem
Nga aldaw, ditoy a bilangen ti nginabras
Ti panawen, sublian dagiti nakain-inaka
A padas tapno dinton dagulliten.
Ragsak ti maris ti bullalayaw
Ket kasta met a dekolor a kinalinteg.
Marismarisan a hustisia
Kadagiti amin a maidadanes:
Dagiti asul a kadaratan, kas pagarigan
A pagpasagan dagiti bigat a nariwet
A gatangen dagiti balitungeg a kusit,
Isuda nga agilad-ilad lattan, agpalpallailang
Iti lugar a pagbakasiunan ti di panagpapada
Ta ditoy, naynay nga agan-anus dagiti kaliado
Nga ima, dagiti bukot a narinat
Kas iti isip a rinaten met ti nangisit a rigat
Ken ti panagbidingbiding iti nalabaga a rosario
Ti kinadaksanggasat. Ta ania ngarud,
Kuna dagiti puraw a laing, ta ania ngarud
Ket kaikarian dagiti amin a magteng,
Agsanud man ti naimbag a gasat a derosas
Wenno agarakattot a lumarga
Iti labes dagiti pasamak a balasubas.
Kas iti panagbaybay-a iti pul-oy
Ti panangipalugod nga ikarsel
Dagiti mannipdot iti turog ken nam-ay
Tapno iti pagiladanda, idiayda a tagikukuaen
Ti maris ti bullalayaw a kakolor ti dagensen?
Ngem ta agsubli ti maris ti bullalayaw
Kadagiti sirmata: datayo dagiti padto
Ti isu met laeng a namaris a ray-aw.
A Solver Agcaoili
Hon, HI
Mar 6/08
No comments:
Post a Comment