Agsisimparat dagiti riknatayo ita:
agatras nga agbanteda iti eskinita
dagiti puspusotayo sadanto met
laeng agtalakias nga agapon
iti karabukob ti agpaparaw nga ili.
Idi Viernes a panangipeksa iti rungsot,
nagtudo dagiti kalsada iti avenida ti Ayala
kadagiti niebe a landok
kadagiti ikkis a lansa a simmalpot
iti kampo dagiti ilablabantayo
a panagugaog.
Anian ta nasken nga ipataming
ti palayag iti dadaulo dagiti sulpeng
anian ta nasken nga ipakita
ti ulo iti dadaulo dagiti birkog!
Agbilang dagiti adu pay a Viernes
iti ramay dagiti aldaw: bigat ti panagtabugga
ta mapaksiat dagiti awanan bain
agmatuon ti panagwarsi
ta agbuteng dagiti di katatawan
iti Malakaniang dagiti antukab
iti agsipnget nga agamenhesus
itan a bugiawen ti mangrabrabii.
A Soilver Agcaoili
Hon, HI
Mar 1/08
No comments:
Post a Comment