Ti Panagbabawi Ket Republika Dagiti Balikas

MANILA, Philippines—It was a call for a halt to the political hostilities. President Macapagal-Arroyo Sunday called on the faithful to pray, reflect, repent and love one another at the start of Holy Week, Inquirer, 3/17/08


Ti panagbabawi ket republika dagiti balikas
dagiti marigrigat, kontra kadakuada
iti daytoy a Domingo dagiti ramos.
(Dagiti ramos, naminsayud laeng nga inummong
manipud kadagiti arubayan, dagitoy laeng
ti piman ti adda a pangkablaaw
iti umay a profeta
ti umisu a mangted iti namnama a pagsadagan.
Dagiti sabali pay ket nangliput kadatayo.)

Ti republika dagiti balikas ket panagbabawi met
nupay ti presidente ket ibagana
nga agkararagtayo ket saysayaaten ti panagkararag a maminsan pay
nga agpanunottayo ket saysayaatentay ti agpanunot a maminsan pay
nga agbabawitayo ket saysayaatentayo ti agbabawi a maminsan pay.

Kapada ti henerasiontayo ken ti henerasion dagiti natataengan
ngem kadatayo, naimatangantayon amin
a rumbeng a maimatangan,

ket ditayon kayat makaimatang pay
iti maysa a banag a mangdarup iti panagimatangtayo
ditayo palugodan daytoy republika dagiti balikas
a mangperdi kadatayo: Ketdi masapul
a dagiti rumbeng nga agbabawi
ket agbabawi a kas iti rebbengna
dumawat iti pammakawan kas rebbengna
agpakleb iti suelo ti altar ket ipukkawda
ibagada ti alfabeto dagiti nagbabakanda
a kas penitensia.


Daytoy a panagbaklay iti krus iti Semana
daytoy a panagibaklay iti dagensen iti ili
a nabantot unay iti nakakurkurapayen a kararua--
daytoy ket maysa a banag a koman ket nairingpasen
iti naundayen a panawen
iti panangpugsat iti tanikala
iti panagpuor kadagiti amin a dokumento ti pannakaibalud
kadagiti duapulo a tawen ti Batas Militar ken ti bungana
kadagiti tawen ti panagsobsobra ti rehimen ni Erap
ket ti sinena iti palso a kinatured
ken ti rehimen dagiti karkararag a madagdagullit
kas litania kadagiti di mayannatup a patron santo.

Isu't gapuna nga itanamitim ita ti araraw
a mangiringpas kadagitoy
a mangdawat iti panangsubbot, mangidemanda
iti hustisia para iti hustisia
mangirekisito iti pannnubbot para iti pannubbot
ket amin dagitoy ket para kadatayo amin itan.

Dagiti exhibit ti kolektibo a leddaangtayo ket mangipalagip:

maysa a plakard nga agprotprotesta
ket nawaya nga agkayabkayab iti pilkopilko a barut
iti kalsaga nga agturong iti palasio ket ti torre ti simbaan
tantannawaganna ti babai nga agkarkararag a nabengbeng ti rupana

maysa a belo a seda ti adda iti nainreinaan nga ulo, panait a balitok
ti naibinggas iti igid, nangisit iti kinapudnona
iti masmasnaayan a masa,
nangisit iti basol ken maris, lengdanna ti rupa, kas kadagiti mata

a nalseb, dagiti pingping a lusiaw
idinto a ti esposo ket agragrag-o
agum-uma iti kansion a rock-a-bye
agum-uma iti nabartek a nalabaga nga arak para iti puso
agum-uma iti mangipatpateg a mangted iti derrep

ket ti nasayaat a sao maipapan iti kinabaknangna,
ti nagadu a kuartana kas mucho dinero
a tinawidna iti pakasaritaan dagiti birkog

kasano, kasano koma, kunana, kasano koma nga agsuitik
no dina met ammo
ti ania man a balikas a mainaig iti daytoy
kadaytoy makapasiudota sao
a dina ammo ti pagbirokan iti diksionario
dagiti suitik?

Kasano koma nga agtakaw, kunana, kasano koma,
no kasta a ti ima ket saan met a kapardas dagiti ima dagiti mannipdut
ti imana ket ti Castila dagiti kolonisador iti nabayag a panawen
ti urat dagiti braso ket kalimpioan ket kalamuyotan
ket awanan daytoy iti uray la nga a pagilasinan
a nangibulsa iti kusing
manipud iti lata ti agpalpalama (ti agpalpalama ket adda
kadagiti agdan a bato iti simbaan, kas paggaammo)
wenno nangrabsut iti awan balorna a pisos kadagiti ina
a mapan makibaratilio iti galunggong
ngem ketdi, pisos a maawatna, nadayaw a maawatna,
kadagiti paspasurot, a kas kadagiti guardia
ti prinsipe iti palasio, ket dida ipakita
ti sairo iti kuarta ken panagungar-manen.

2.
Siempre, dumteng ti panawen ti panangaskasaba.
Kas iti daytoy a Domingo dagiti ramos
dagiti ramos a kabaelan dagiti kailian
nga itugot iti templo dagiti mananglilipat a dios.

Kunaentayo: amen, amen,
agingga iti yuumay ti pagarian.
Dagiti bendision a tagtagiurayen,
dagiti grasia a tagtagiurayen--
ket ti kanibusanan amin dagitoy.

Ti panagbabawi ket republika
dagiti balikas dagiti marigrigat
idinto a dagiti aglablabunan
ket kukuada dagiti agul-ulbod a sao
a kontra kadatayo.


A Solver Agcaoili
Hon, HI
March 16/08