Ministro A Pagwadan Dagiti Balitungeg

"By his living here among us, we knew he was not corrupt,” said a neighbor, Adela Aceron, of Crispin Beltran who died from a fall while fixing his modest house's leaking roof in anticipation of the rainy season. Inquirer, May 21, 2008

Ministroka a pagwadan dagiti balitungeg, Ka Bel
Ka Crispin, kakaen dagiti amin nga agngilngilin
Ken rigat. Tarimaanem ti agubo a bubong.
Iti panawen ti tudo, aglayus ti salas a paguldagan
Met, ket agkaraska kadagiti rugit, luneng, danum
Ti managbabain a tudo iti Commonwealth.
Idiay met a nangrugi datao a makariing:
Diak umakar ditoy, kuna ti bumalayko
Iti panangigigirko iti masapulan a dayaw
A di met, kakami, makaisaang iti pangngaldaw.
Mangisuro iti matematika ti bumalay
Tapno makuenta dagiti ubbing ti mortal
A basol dagiti mannanakaw iti ili
Kadagiti ugaw nga iti ungot koma nga agindeg
Agtalinaed a mangisagut iti pannakarennek.
Isu a kasta: iti kararag para iti salun-atkami
Met a nagrubuat kadagiti amin a sakripisio.
Duakami a manursuro iti adal ti panagkapuyo
Dagiti tumeng, barukong, ken dakulap.
Kas kenka, kas kenka, ket diak masbaalan
Ti rikna ita: Namin-anoka a tinodas dagiti buteng
Tapno biagen dagiti tured nga itedmo iti ili
Kadakami amin nga umili nga uray
Man agpangkis dagiti amin a pirak
Ket dikam pay nakaraman iti sapsapo ti dakulap?
Matnagka iti ngato tapno agkanabtuog
Iti semento dagiti amin nga immaddangam
A kaduanakami manipud iti rugi
Agingga iti kanibusanan dagiti pammakawan.
Biagendakanto kadagiti karimi
Dakami a mabati tapno umaddangkami a kas kenka
Iti tarnaw dagiti palimed ti panangipateg iti pada.
Agkantakaminto kadi, daytay kanta ti rebolusion
Dagiti bulsa ken puso, kararua ken karayo?
Ket apo Dagaka nga agsubli. Ti basbasmi ti agnanayon
Nga adigi dagiti mabangon a bigat ken rabii
Iti hardin a nakapasagan ti nakirinnyupak a bagi
Iti kalbario a pagungaran ti balligi ti agladladingit nga ili.

A Solver Agcaoili
Hon, HI
Mayo 20/08