PAMMAKADA KEN TATA FRED

(Naibasa iti massayag ni Tata Fred Saludes, maysa kadagiti fundador ti GUMIL Hawai’i, St. Philomena Church, Salt Lake, Hawai’i, Septiembre 5, 2008—AS Agcaoili)


Adda met daniw iti isisina, Tatangmi a Fred.

Sagrado a daniw daytoy iti saning-i a palimed

Nga iti agsapa a panagpakada ken Nanang Pacing

Ket ti panagkarayo iti panaglanglang a singin.

 

Mano kadi a Sabado a napnuan ayat ti kastoy

Nga imbatin iti lamisaan, iti diding, iti sulinek

Ti isip kas iti aminen a panangiwaksay kapuy

Mano ta mano nga isem ti pinanaganam sariwawek

 

Tapno iti inka panangibaga iti panagsaraaw ti utek

Kas iti bisin kadagiti adal a mangted iti rennek

Ket iti dayta a bigat makapudno ti ipapanaw

Kadagiti namaris nga ayat, pangep-ep iti waw?

 

Agpakadakam kenka, dakami amin a silalagip

Sika nga inauna kadagiti amin a pammateg

Iti Literatura Ilokana, kabulig maitukit a raraep

Iti nagan ti GUMIL Hawai’i, aglaylay, maregreg!

 

Ngem ta ti isisina ket ti kinaaagnanayon, Tatang Fred:

Sika a tandudo ti tagainep a mailayon, pangpasingked.

Ta sika ti pungto dagiti pakpakauna ti gunglo a napintek

A panagsasarak dagiti mannarita nga iti pluma sariwarek.

 

Iti puli kas kadagiti sari-ugma ti panangaklili kadakami

Iti pagsasao kas iti pattapatta ti ili, dakami a tartarudi

Ditoy a lugar nga adayo kadagiti simmangbayen nga aldaw

Ditoy a linak-ammi ti agkawili a ribo nga ipapanaw.

 

Ta agsubli dagiti nagmanto a linabag nga ikur-it

Iti aldaw ti ipupusay dagiti agdung-aw a ladingit.

Matmatam, Tatang Fred, matmatam ti kaawan

Iti agdanagdanag sagpaminsan a pakapukawan

 

Ta inka pimmusay a ngem balonem dagiti tured

Ket kunaenmi ita kenka: dayyengmi di kadi isaed.

Tay bay-annakami kadi nga agumbi, kas iti dati.

Pamuspusan daytoy a pangiyaw-awan iti pulkokmi

Iti kastoy a pannakaulila dagiti nasam-it a balligi

Ta GUMIL Hawai’i ket mabati iti estoria a matagibi

 

Nga ita kayatmi nga ipakaasi: Ikararagam, Manong Fred

Kas iti panangikararagmo kadakami kas pangsarikedked

Kadagiti agluluken a rikna, lua nga iti alintatao agtalinaed

Ta dakami a panawam ti mapasag kadagitoy a panagkedked.

 

Agkedkedkami ita:  ala dinakam koma panawan

A ngem iti Namarsua ti balikas inka sumaklang.

Kasano ngarud nga igawiddaka, kasano ti panangitantan

Iti daytoy nga apokalipsis ti biag a taraudi ti kaibatogan?

 

Ngarud kunami kenka: alaem amin dagitoy a saem

Nga ipabalonmi kenka. Saem ray-aw nga adiem 

Ta iti panagballasiw iti dan-aw ti sabali a biag

Iragpinnakam koma kadagiti nasudi a karkarag.

 

Ngarud ita itedmi kenka nga ipakuyog, itedmi nga ipabalon

Ti bendisionmi nga iti ayatmo kadakami ket itan nabuslon

Iti nagan ni Nanang Pacing ken dagiti ipangparuna nga annak

Iti nagan ti GUMIL Hawai’i ket bitbitem ti basbas a naragsak.

 

Dios ti kumuyog, Tatang Fred, ti Apo ti manarabay

Iti dalan ti kinaagnanayon sadiayka nga agtalaytay

Ta daytoy ti tarigagay, sandi dagiti birtud ken galad

Ti tao a nakapudno iti Dios a naasi iti nawadwad.

 

Dios ti kumuyog, Tatang Fred, kenka ti bilinmi.

Pagtipunen dagiti ima a kanayon para kadakami

Ta sika koma ti mangidanon adu nga arawrawmi

Iti Dios Apo nga inaldaw-aldaw karkaraptanmi.

2 comments:

marlon said...

makapasaeddek daytoy nga daniw yo apo nga nagsurat!

Agyamanak nga nakabasa ta mariknak nga maysa ak nga tao nga mapan to met no dumteng ti panawen.

Sapay kuma ta nalimpiyo ti maikur-it met nga linya ti pagdalanan ti biyag ko.

Makalukat panunot daytoy daniw yo apo.

ariel said...

Marlon,
Wen, agpayso, ading. Iti talinaay ti Apo, sadiay ti taklin. A ngem adu a rigat ti dalliasaten a kabulig ti araraw a sapay ta makapudnotayo amin. Kasta ti biag, kasta ti paglintegan ti biag. Ti napintas a lagip ti kinaimbag ti maibatitayo, awanen sabali pay. Agbiagka!