Panagorder iti Masaker

"Planado ti masaker," kuna ti vise mayor ti Buluan, Inquirer, Nov. 26, 2009

Naggapuak iti maysa a pagilian

ti daradara a rusrusngi,

babawi, us-ustil. Maysa a republika

daytoy a leddaang a naynay

tawiden pay di ikankano

uray no sursuruentay pay lat’ agbiag.

Ket ita daytoy

nga order ti panagmasaker,

limapulo-ket-pitoda amin

ken mabalin nga ad-adu pay

a dagiti laeng babbaro a tanem

ken ti mammapatay a backhoe

a di makaammo nga agpatubbog iti lua

ti agbalin a dadaulo

dagiti amin a makipagladladingit iti Maguindanao

iti daytoy a daga ti Ampuatan

a nalipatanen ni Allah ken ti Dios

iti daytoy a bigat ti Lunes

a dagiti ang-anghel ket nagmutit.

Nalipatanen ti presidente ti pagilian

no ania ti kayat a sawen ti ladingit.

No mapukawmo ti lagip

ken dagiti ina, dagiti dumadangadang

ken babbai a nakakita

iti kaibatogan dagiti naimbag nga aramid

ket sika ti mangidaulo iti daga,

insegida nga alaen ti rosario,

pilkuen dagiti tumeng

ket itanamitim dagiti amin a supusop

daytoy kolektibo a dung-aw.

Mabalin a daytoy ket kumboy

iti ipupusayda kas iti prosesion

dagiti namnama nga awanan nagan,

ket makitatayo amin

ket mabasatayo amin

ket amin dagitoy ibagatayo

iti kumpesar iti bigat nga ar-arapaapentay

a maaramidtayo kadagiti siglo

a dumteng kadatayo

no umdas ti naimbag a gasattayo

wenno itanemtayo kadagiti darat

ti panawen no ditay masarkedan a lappedan

daytoy a kinadamsak

a maawatantayo laeng babaen

iti ginalgalon a dara.

Aramidentay a naganagan itan

ti daga babaen

kadagiti laslasag ket buteng

kadagiti bagi ken anges

iti pammati ken pannakaupay?

Ket agordertay iti masaker:

limapulo-ket-pito

ket ti bilang umad-adu

iti kada aldaw no ti kinapudno

ket agsubli kadagiti panid

ti testamentotayo.

Naggapuak iti pagilian

a mangipato a ti demokrasia

ket isu met la nga isu iti pannakamasaker

ti asi a nadiosan

ket mabati iti lagip napalabas

nga iti masakbayan ket ur-urayen

kas iti pannakaidasay ti rekuerdo

a naynay nga agbibiag.

Limapulo-ket-pito a biag

ti napukaw iti Ampatuan

ngem kaliadotayo, kalmado piman.

A Solver Agcaoili

Manoa/Nov 25/09