Saan a gameng
ti agas ti aradas.
Kararua ti nagtagisugat
ket sadiay,
iti lugar dagiti ulep
a mangipakdaar iti tudo,
sadiay a parsuaen
dagiti kalgaw
ti rikna a maal-alaw.
Agibit ta agibit
ti ina iti kastoy
a buya
ti pannakaidadanes.
Idi man.
Ita man.
Idi ken ita,
isu met laeng
kinabarengbareng.
Estoriatay met ngamin
daytoy, daytoy
a panagkayangkayang
a pannakailuges
ti utek
kadagiti amin
a nasam-it a kari.
Ditay makasursuro,
awanantay iti sursuro
ta nalaaw dagiti kaltaang
nga agapon
kadagiti taengtayo
kadagiti taltalontayo
a mabisibisan
kadagiti sabasabali
a dara ti pammadso.
Mangriknatay koma, a,
ngem kaskasdi met
a di mangrikna
dagiti sisusugat
a puso ti ilitayo.
Gibusantay koma
ti panagdaringungo
dagiti bingkol
ti panagsarua
dagiti agbanatabat
a ragsak
dagiti agbasingbasing
a linnaaw
iti malammin nga aldaw
ngem anian
ta dagitoy
a rikna
ket kasingin
dagiti pukawpukaw.
Isu a ti agas
ti aradas
ket tay tamay
ti angin,
daytay man mangikipas
iti kinabulbulitor
ti naiwawa a kasinsin.
A. S. Agcaoili
Aldaw ti Panagyaman
Nob. 24, 2005
Carson, CA
No comments:
Post a Comment