Agrarana amin
a rikna ditoy
a lugar
ti panagbaliudong.
Kuna ti megalotto
a tallo gasut a million
ti katukad ti de-numero
a gasat, gatangen daytoy
iti sandi
ti panagbangungot
iti rabii,
daytay kannayon dagiti araraw
a saantay koman
nga umadayo
tapno agbirok
iti maisakmol
kadagiti law-ang
dagiti estranghero
a rabii.
Ditoy adayo,
agmalangakami
a kankanayon.
No dadduma, bilangenmi
dagiti kuton nga agarak
kadagiti asukar
nga ibellengmi iti datar,
napia laeng
a pakaragsakan
a pangandingay
iti kinapimpiman
dagiti agsapami,
dakami a makilumlumba
kadagiti gasat
a ganggannaet
iti appupo.
Ikidemmi
dagiti nabannog
a mata.
Iti panunot, iladawanmi
dagiti aldaw ti kinalabon,
salsala dagiti agkanaganan
panagtutungtong a kadua
dagiti tambutambong
panaginudo iti sardam
a nalamiis dagiti piditpidit.
Balinsueken
ti naimbag a gasat
iti panagkuremrem
ti muging.
Sadiay a biroken
dagiti babato,
dagitay mangisuro
iti napintas a paris
dagiti elemento.
A. S. Agcaoili
Carson, CA
Aldaw ti Panagyaman
Nob. 24, 2005
No comments:
Post a Comment