Agkurnoka iti kuridemdem
a bigat ditoy Los Angeles
kalpasan ti aldaw
ti panagyaman
a pinagbidaan dagiti pabo,
isuda a nanglamut
kadagiti trigo
a naaramid koma pandesal
para kadagiti ub-ubbing
a kuttungi ken saksakidol
iti naggapuan nga ili,
iti papanan nga ili,
pagindegan dagiti gasut
a sansaning-i
iti bigat
iti rabii.
Awan ta
dimo matilmon,
dimo mairusok
ti kinapalangguad
dagiti agbubutit a lamisaan,
dagiti bisti a saramsam,
panggudas kadagiti amin
a mabisbisinan,
ar-arak kadagiti adu
pay a makan.
Malagipmo ti rupa
ti bisin
kadagiti kataltalonan
idiay San Jose iti Baggao,
kas iti ladawan ti kinapimpiman
kadagiti ubbing iti pagbasuraan
iti Kamanilaan, sadiay
a sentro
dagiti amin a kita
ti kinamannibrong
dagiti malalaki iti konggreso
dagiti nakabarong,
agipaagong iti panaginglesda
kadagiti kari ti latok
wenno bandeha,
pagikabilan
iti pampanunoten
laeng a tig-ab
ti panagmalmalanga.
Agkiraos ti tian,
agsanaang kalpasan
ti mammagusto
nga aldaw ti panagyaman,
agulser ti utek
a mangpanunot
ti bangbangir a kalintegan
dagiti papel a papel
dagiti sakmol a sakmol
dagiti tilmon a tilmon
ken dagiti aguy-uray
kadagiti maregmeg
kadagiti tedtedda
kadagiti saraaw
iti nagabay a pammigat.
Manipud ditoy siudad
ti kisang ken kinalabon,
agingga iti pagilian a naggapuan,
nga ili met laeng
ti kaskasdid a kisang
ti kaskasdi met a kinalabon,
agtibnok dagiti arak ti ubas
ti arak ti basi
ken ti sakit ti nakem,
panaglidok a panglamlamiong
iti naparkagan a karabukob
a manglanglanggong,
pangugas iti kararua
pangontra iti panagmauyong
dagiti pintasen a sabsabong
iti tengnga dagiti malamot
a riwriw nga agpunpunsion.
A. S. Agcaoili
Carson, CA
Nob. 25, 2005
No comments:
Post a Comment