Gambang

Dumteng daytoy a rikna
ti nagkalkallautang
no kastoy nga agpakada
ti sipnget iti lawag
ditoy Carson dagiti nagtalawataw

ayuyang dagiti mamati
iti nailian a bannuar a bato
arkos itan a propeta ti kappia
ti sariugma a rebolusion
dagiti daradara a pluma.

Iti sulinek ti siudad dagiti exilo
nga agarubos ti tinta
aglua nga agikabkabesa
kadagiti addang a mabilang
kadagiti pangal

a mangidaton
iti naimbag a gasat
kontra ti gambang
dagiti malas ti malas
a yuli kadagiti pantok

iti korona dagiti agamangaw a kayo
nga agsampaga kas iti makailbot a sirkulo
tapno awatenna ti ayat

ti raya, natakneng
ken nataraki nga ayat
ti bara manipud iti sellang
ti sipnget nga agkayangkayang
tapno mangdusa, mangranggas, mangtagikua
kadagiti mangtikawtikaw a ragsak

kadagiti pirak, wenno balitok,
wenno diamante, wenno amin a babato
iti sao kas iti aramid
idi punganay kas met laeng ita
iti amin a panawen
nga agari ti inaradasda
a katkatawa.

Gambang daytoy a rikna,
kas iti panaginkukuna
ti siudad dagiti exilo
kadagiti agsangpet
tapno agbirok iti pia ken karadkad
tapno makipagsangal iti pannakigasanggasat.

Iti atiddog a sipnget,
agguardia ti arkos itan a bato a bannuar,
bantayanna dagiti darepdep
dagiti amin a mannanakaw iti rang-ay.


Carson, CA