DEGDEGAM: RITUAL ITI BASBAS, ASIN, BAGAS, & ANGLEM
(Written as part of the Opening Ceremonies, 2007 IALC Conference, Philippine Consulate General, Honolulu, HI, October 27-28, 2007)
Degdegam, o Apo a Mannakabalin
Degdegam, o Apo a Taklin ti amin
Ayatmo kadakam a parsua pabilbilin
Degdegam kaasim ken pannakabalin
Daytoy nga asin ti naunday a biag
Igamermi iti linnaaw iti kannag
Itibnokmi iti adu a bendisionmo
Dakami a makasapul dungngo
Daytoy taraon a bagas a malak-am
Mangted iti rennek ken pagnam-ayan
Ipaaymo kadakam ti amin a riknam
Sika nga Apomi a saan a sinsinanan
Daytoy nga anglem ti asuk ti kaasi
Dakami a mangdawdawat iti aklili
Ipaaymo kadakam kappia iti panunot
Tapno magabenanmi amin a rungsot
Ta sika Apo ti Mannakabalin-Amin
Ket sika’t pakabuklan daytoy a pasken
Sika ti Apomi a wanwanmi iti saem
Ti Apomi a mangawat iti daytoy ngilin
Agwarsikami kas panagapodios
Dakami nga in-inabo ti Ilocos
Annak iti Amianan a paisalakan
Annakkami amin ti pagilian
Degdegam, apo, degdegam
Degdegam ti basbasmo itan
Tapno iti kararua ti pulimi
Makasublikami a siuumbi
A Solver Agcaoili
Hon, HI
Oct 25-2007
No comments:
Post a Comment