Glorietta dagiti Saan a Gloria

Saan a sinsinan daytoy. Wenno asi-asi.
Ta ania kad’ ti langa ti tani kadagiti matay
Lattan nga agkudaap wenno aglang-ab

Iti estranghero a pammateg ti ili? Agbilangtayo
Manen kadagiti maidasay a bagi, bigat,
Ken bibineg. Wenno panagkukutel ti isip

Ta narigat met a maawatan dagiti gapu
Ti panangngaasi dagiti mitsa ti bomba
Wenno mitsa ti kinatirong iti uneg ken ruar

Iti palasio dagiti amin a sabidong. Terorismo,
Kunada. A ngem ania ti maganab iti daytoy a balikas?
Buteng iti buteng met laeng a di agressat,

Manglangan a mammigat sagpaminsan
Manglangan a mangrabii ngem agbirok
Iti mayatang a rangranggas? Wenno dara?

Wenno agtutubo a darepdep kas iti pinatayda
Kadagiti siam a naisakripisio iti altar ti pirak?
Panapanawen, kuna pay dagiti kas kaniak,

Siak nga exilo kadagiti pasamak, testigo
Dagiti agkalimduosan a panagrigrigat.
Diak makaidna iti kastoy ket isaldak ti ridep

Iti panagbilangko kadagiti tikatik ti pagorasan
Wenno iti tektek ti saltek nga umasibay iti uluanan
Wenno ti wanerwer ti kanalbuong a mangbriat iti lasag.

Ikabesak ti teddek a paulo dagiti damag: Glorietta
Dagiti amin a saning-i dagiti mangmangged,
Glorietta dagiti awanan gaway a kinadaksanggasat.

Mabatiak nga agmalmalanga. Diak ammo ti sukog
Ti langit itan, wenno angot ti impierno wenno tabas
Dagiti rapas nga ayat. Wenno tadem ti bales.

Aurelio Solver Agcaoili
UH Manoa
Okt. 19-07

No comments: