RABII TI KORONASION: DANIW A PANGORONA

( Indaniw ti nagsurat iti 3rd Scholarship Pageant and Coronation Ball, San Nicolas Teachers Association of Hawai`i, Pacific Beach Hotel, Honolulu, HI, November 4, 2007)

NADAYAW A TALLAONG ING-INGUNGOTEK IDA
ADDATAYO AMIN DITOY A SANGAPADA ITA
DATAYO A TESTIGO DAYTOY A KINANGAYED
DATAYO NGA ADIPEN TI ARABAI TI TALGED

TA ITI DAYTOY A RABII KET RABII TI BALLIGI
PANANGITALEK ITI REYNA TI KORONA TI KARI
BILEG A NAPNUAN PINTAS KAS ITI SAPASAP
TI PADAPADA NGA AYAT NGA INTAY IPASAGRAP

KET BAY-ANDAK MARARAEM, APPO A TALLAONG
IPALUBOSYO NGA AGLUGAYAK KADAGITI SABONG
PANGNGARIG AMIN-AMIN NGA AN-ANEK-EK
DATAYO AMIN A MAKAAMMO ITI SASAINNEK

TA ITA A RABII ITI NGAYED DAYTOY A BUYA
A PAGRARAGSAKANTAY AMIN A SANGAPADA
DATAYO MANGSAKSI ITI PANNAKAKORONA
KADAGITI MANGIRUPRUPIR ITI KARIRIKNA

TA ASINNO KOMA NO DI MET LAENG DATAYO
TI AGRAMBAK NAIMBAG UNAY A GASATTAYO
TA TI REYNA NGA ARABII KADAGITI RABIITAYO
ISU MET LAENG IMNAS NGA IDADDADUMATAYO

KAS KADAGITI PRINSESA A NAPUSAKSAK
KAS KADAGITI SABONG UBING A BIGBIGAT
NAGDIGOS KADAGITI DIAMANTE A LINNAAW
PAKABUKLAN TI NAPAAMO NGA AR-ARARAW

KENKA ARI A BABAI NGA ITI PODER IKOT
KUKUAM TA KUKUAM BURTIA ITI PARIKUT
SUNOTAM NGA IWARAS DAGITI BIRTUD
TAPNO DITOY ARPADMI INKAM IBALUD

IBALUDMI TI GASAT A NASAYAAT
SAMINTO TAGIKUKUAEN TI RIMAT
KAS RAYA DAGITI SILAW ITA A DARIKMAT
KAS AGNANAYON A RAY-AW KET SIPSIPAT

NGARUD GAGAYYEMMI KEN PAPAGAYAM
KADUAENDAK NGA AGLUGAY, AGLAK-AM
PANANGILALAEM DAYAW TI REYNA ITAN
ITI DAYTOY A TARIPNONG MABALANGATAN

KADAGITI PRINSESA AMINTAYO NGA AGLUGAY
KADAKUADA NGA AGKURNO RUMBENG UNAY
TAPNO ITI KASTA MAISURAT TARIGAGAY
MAIMARKA LAGIPTAYO A NAKIDANGGAY

TARIPNONGTAYO A MANGMINGMINGMING ITA
TI NAKALLALAGIP A BUYA DAYTOY A PADAYA
SALAENTAYO KETDI AMINTAYO A PADAPADA
SALA TI PANTOK NAGKAADU A KATKATAWA

KENKA REYNA NGA EVELYN AGKURNOKAMI
ISAGUTMI KENKA SAGUT DAYTOY A RABII
IDULINMO KOMA ITI SULSULINEK TI PANUNOT
KAS PANGLAGLAGIPMO KADAKAM A BUYOT

KADAKAYO PRINSESA A NALASBANG
KENKA MS MARCY A TI ISIP KAMANG
SIKA TI TAKLINMI ITI INALDAW-ALDAW
PANGITEDAN NAIDADDADUMA A DAYAW

KENKA MET PRINSESA MECHELLE ITI SIBAY
SIKA’T PAULO NARUAY NGA ANDINGAY
ITI PANUNOTMI NGA IMULA’T SAGUDAY
TAPNO BARUKONG AMINKAM AGRANG-AY

DAKAYO AMIN TI INKAM PAGULIDANAN
DAKAYO AMIN TI INKAM PAGKAMANGAN
DAYTOY NANGAYED A RABII’T SAKSI
TI LINGLINGAY SAN NICOLAS NGA ILI

ISAGUTMI KORONA TI DAYAW TI TALLAONG
KET ISUBLIYO KADAKAMI TI PAMENDISION
ITI KASTA KET MAULIT-ULIT RAGRAG-O
AGAPON TA AGAPON ITI UMOK TI PUSO

NAIMBAG A RABII KADAKAYO A SANGAPADA
PADAK IDA A BABAONEN NASUDI A REYNA
PADAK A PABABAON KADAGITI PRINSESA
PADAK NGA AGTAMED PODER ITI KORONA

A Solver Agcaoili
UH Manoa/Nov 4, 2007