Mannalon nga Awan Talonna

Manila, Filipinas--Awan pay laeng dagada kalpasan ti nasurok a 100 nga aldaw manipud panangrugida nga agmartsa a mapan iti Manila idi Oktubre idi napan a tawen, dagiti mannalon iti Sumilao ket agmartsadanto manen tapno idramatisada ti panangtuntonda iti karbenganda iti daga. Iti daytoy a panagmartsada manen, likawendanto ti Malakaniang kas simbolo ti panangtuladda iti biblikal a panangpalawlaw dagiti Israelita iti Jericho. Inquirer, 3/4/08

Agbanag kadi daytoy a hiperbole
nga ebanghelio ti dumteng kadatayo
datayo a tattao iti talon
ket ti talon a mangdungdungrit
kadagiti imatayo ket naynay
a lumsot iti gemgemtayo?
Dayyengantayo dagiti duayyatayo
iti lubong, riingentayo ti biagna
babaen iti ling-et, bagyo, ken init.
Ni kaano man ditayto makatagikua
iti ania man, paggaammotayo dayta.
Ti laing dagiti an-anito a napasagen
kas iti laing ni Macliing: maysa a kinakusit.
Myasa a leksion manipud iti sakripisiona
kadagiti bala, isuna a nangirakurak, nangisawang:
"Ditay matagikua ti ania man a talon.
Ti talon ti mangtagtagikua kadatyo."
Ammotayo, siempre.
Kinaagpaysuanna, ammotayo no kasano.
Kasta met ngamin ti panagbiagtayo:
ti talon a mangit-ited kadagiti amin a kasapulan
ania man a masapultayo aginggana itatta
no dagiti inuritna ket dinatayon dardarepdepen
nupay nakadulin kadatayo ti tagainep ti ani
ken pusi ti mais, grano ti pagay
espiritu dagitoy ti narakrak, din matarimaan a biagtayo.
Agmartsakami kadagiti kalkalsada a siwayawaya,
kakibintayo dagiti ladingittayo a publiko
kas iti panagmartsatayo kadagiti bengbengkag,
dagiti nasaranta a takder ti mula nga agsoldado a proteksiontayo
dagiti anito nga awanan mata kas guardiatayo kontra iti didigra
ket dagiti rabii ket nalamiis, agbasabasa, naunday
iti nagkampuantayo tapno ipalgaktayo kadagit tao
a nagpasarantayon daytoy nga impierno
a pananglipattayo iti amin kas iti karbengantayo
a mangnagan iti potente a bukel nga imula
dagiti agkatkatawa a paramut nga itugkeltayo iti daga
tapno ray-awen ken pangilukatan iti kararua ti nabartek a pul-oy
tapno iti kasta ket adda dagiti napudno a sabsabong,
natimbukel a bunga, ken nabendisionan a pabor
nga isublitayo iti agsalsala a waig a ditoy ket nabiag iti lames,
adu ken dadakkel, kasta met iti pammati a rugi
dagiti ad-adu pay a pammati, ken ti pannakikammayet
ti kapunuan dagiti ayat, narnekan ken napnek
iti Sumilao ken iti uray sadinno man.
Agguardia dagiti bambantay
iti aramidentayo a sumaruno.
Mabalintay a pakawanen dagiti bagbagitayo,
ket kas iti santuario
ay-ayuen ti pusona
ket palugodantay ti di panangitulok
nga isuro kadatayo ti unget.

Tagikukuatayo, ti daga, ken ti di panangitulok.

A Solver Agcaoili
Hon, HI
Marso 5/08