Sabado daytoy dagiti pangngarig.
Ti dua a tasa a kape ti umuna a saksi
dagiti an-anek-ek kontra iti kontra-sao.
Dakes ti asukar, kunatayo koma,
kas iti sinam-it nga igamer iti kontra-daniw.
Mangted iti bibineg iti selula ti isip.
A ngem agbaaw ti agas-asuk a danum
nga itay ket kapada ti bara
iti barukong ti appigud a mannaniw
nga iti isip agapon.
Apay ngamin nga adda
kastoy a dagensen kadagiti pluma
wenno kadagiti blangko a papel?
Apay ngamin a ti sirmata
a mangkurkuriro kadatayo
ket maysa met a palab-og?
Dinaka inggaan ti imahe
kas iti sirmata ket iti agbabaaw a kape
permanente a residente sadiay ti mutia!
Kasano a siluam ti pagaw iti kataltalonan
dagiti sagrado a sao no awan pay
ti pakauna dagiti makikuaresma nga aldaw?
Kasano nga ipakat ti silo ti pangngarig
iti katengngaan ti agmatuon a ti inana
ket mangriing iti barsanga wenno kappakappa
wenno 'tay saluyot ti aso a no ngalngalen
ket iti ngalangala a maigangal?
Nasuprak kas iti balikas dagiti kontra-daniw,
pasamak man dagitoy wenno am-amangaw.
Ti mannaniw a sisusugat aklonenna ti dunor
kas iti leon wenno tigre iti muyong
dagiti makaagas a palabras.
Adda sukal iti tupra
Adda sukal iti katay.
Adda sukal iti katay.
Adda sukal iti pananguros iti muging.
Iti agsapa dagiti paulo ti mapartuat a daniw
sadiay nga agalinaga
ti mannubbot a ragragsak.
Isu nga abrasa ti itedko nga isubad.
Kas iti abrasa a diyo impaidam.
Aklonek ti kananakem nga impadigoyo
ita kaniak, isabukel tapno iti sulinek
dagiti lagip ket mangpakired daytoy kaniak.
Balonek daytoy kadagiti panagallaalla,
kadagiti panagbagamundo dagiti linabag
ti plumak ket iti saklot dagiti rabii
kas iti susop nga agsikog iti mutia,
inawek ti mannubbot a balikas.
A Solver Agcaoili
Hon, HI
Agosto 30/08
2 comments:
Maipalunapin iti kaunggan ti bugas daytoy a daniw, M'g Ariel. Maragsakanak unay a nakaabrasa kenka babaen ken M'g Amado.
Razi
Razi, ading:
Kastaak met. Ti ragsak ket agpuligos no ammotayo a pagpuligusen. Ammom, ket agyamanak. Nagasat a pannakiam-ammo kenka.
Post a Comment