(Nota Bene: Naawat daytoy numo daytoy a surat manipud iti email nga aggapu ken Ric Agnes. Maysaak kadagiti adu a napatulodan. Ti maysa nga argumento, agbalinto kanon a 'binubullagaw' ti Pedro Bukaneg Awards gapu iti pannakaited ti pammigbig kadaytoy numo, siak a maysa a bassit-usit a mannurat a dina pay nagteng ti edad a kunkuna ni Ric Agnes a pagannurotan. Kannayon ti argumento ni Ric Agnes a 'balangkantis ti medalia nga iyukkorda' kadatao ken 'naakumodar' daytoy numo gapu ta ditay kano pay 60! Kaasi ti Apo, adayotayo pay nga agseisenta. Ti publiko ti mangeddeng kadaytoy kaudian a lohika ni Ric Agnes. Copy and paste daytoy--awan surok, awan kurangna. )
Aurelio Agcaoili,
Honolulu, Abril 1, 2009, April Fool's Day
Abril 2, 2009
Honolulu, Hawaii
Silulukat a surat:
Sinerreken ti virus ti Pedro Bucaneg Awards (PBA)!
Idi 2007, agpada a nainominar da Appo Francis Ponce ken Baldovino Valdez para iti Pedro Bucaneg Awards. Gapu ta naaros ni Baldovino Valdez iti puntos, inkeddeng dagiti mangimaton a sukatan ti pagannurotan ti PBA—maingato ti tawen ti maawardan iti 60 wenno nasursurok.
Gapu iti daytoy baro a pagannurotan, nadisqualify ti front runner a ni Francis Ponce. Gapu iti daytoy a teknikalidad, naited ti award ken ni Baldovino Valdez!
Wen, natiritir ti pagannurotan tapno maited ti award ken ni Baldovino Valdez!
Idi 2008, sagudayen ti pakaammo a naipablaak iti Marso 17, 2008 isyu ti Bannawag, nga agpatingga ti pannakaisubmitar dagiti nominasion iti Marso 31. Ngem iti miting ti GUMIL Filipinas (GF) idi Marso 16, napilin ti nangabak iti PBA!
Dua a lawas sakbay ti dead line, nalpasen a napili ti awardee!
Iti email ni Baldovino Valdez, Presidente ti GF, ken ni Apo Amado Yoro, a nabasa ni Apo Yoro idi Marso 21, kinuna ni Valdez a nalpasen a napili ni Apo Francis Ponce a mapadayawan iti Pedro Bucaneg! (Naibase daytoy iti naisapit nga artikulo ni Apo Yoro.)
Ania ti napasamak kadagiti dadduma a nominasion a naisubmitar iti nagbaetan ti Marso 17 ken 31? Naibelleng!
Daytoy kadi ti maikanada nga aramid kadagiti pasalip?
Iti met email ni Precillano Bermudez, Chair ti Selection Committee ti Pedro Bucaneg Awards 2008, ken ni Apo Yoro, kinunana: “Napintas ti personal a maipadamagko: ni Kabsat Francis “Sabong ti Biag” Ponce ti kandidatok para iti PEDRO BUCANEG AWARD 2008…”
Maysa a Chair ti Selection Committee, adda bukodna a kandidato? Saan kadi a rumbeng a neutral dagiti adda iti dayta a komite agraman ti pangulo?
Dua a lawas sakbay ti dead line, nalpasen a napili ti awardee agsipud ta adda bukod ti Chair (Bermudez) a kandidato!
Ita a tawen, 2009, patiek a tapno maakumodar ni Aurelio Agcaoili a gayyem ken kadua ni Bermudez iti TMI, sinukatan manen da Bermudez ti pagannurotan ti PBA! Mabalin kanon a maawardan ti agtawen iti nababbaba ngem 60! (Kano agsipud ta agpapan kadagitoy, awan GUMIL Chapter a naikkan iti pagannurotan ken wagas ti panagpili iti mapadayawan iti PBA.)
Gapu iti dayta a sistema da Bermudez ken Valdez ken dagiti padada a manipulator, patiek a balangkantis dayta medalia nga iyukkorda! Medalia nga awanan anag, awanan kaipapanan, awanan kaikamudingan!
Wen, sinerreken ti virus ti Pedro Bucaneg Awards! No mapalugudan daytoy a binubullagaw a sistema dagiti manipulator, awanton kaipapanan ti Pedro Bucaneg Awards.
Ric Agnes
No comments:
Post a Comment