dagiti bulbullagaw
nga iti sagrado a balikas
ket ti araraw ti pang-aw.
Gudasenda ti daniw,
rukuroken kas iti mapadara
a manok tapno nakemda
mabugiaw, agtalawataw.
Isuda dagiti kalaingan
dagiti nalaing a mannanao
natarabit iti panagparbo
panagulbod tapno agsaoda
iti balinsuek a pudno
agpadakes tapno agaramid
iti nasayaat a naikulbo
kadagiti ganggannaet a gutigot
a kadagiti blangko nga iskrin
ket ti allilaw ti pagimonan a balitok:
umuna a lukat a surat
ti bubussog ti laklakaddogan a suyot:
case closed.
maikadua a lukat a surat
ti mannaniw dagiti warsi
a pamutbuteng iti aliw
a no aguttog ket kabbalayenna
ti rurog ti magatang a dayaw
nga iti palad ket balitok:
case closed.
Namak pay nga ipabasol
nga iti kakaisuna latok, kas pagarigan,
ket ti bendision dagiti gagayyem
dagiti kumpadre ken kumadre
ket dagiti aminen a pagayam
a kadagiti rugso ti sao a nagasang
ket ti kayat a sawen ti abalbalay
wenno pananglamlamiong
kadagiti pada a buong ti ulo
dagiti mangperperdi iti salun-at
a kadagiti proposision ti kinaasinno
ket namsek dagitoy
a waragawag a mangitandudo iti bagi
naiyaw-awan ken mangyaw-awan
a ngem patien dagiti adipen ti artiok
isuda a di makaaddang
tapno koma adalenda ti allintok.
Ngem piman ta di makapudno
kadagiti paaweng a di makaagas
wenno ti tuldek dagiti ranggas
nga iti kada sao ti balasubas
ket ti panangputedda iti ulo
panangitedda iti pangngeddeng
a ti agsolsolo a laing
ket adda iti gunglo dagiti mangirubo
dagiti alienado a gagem
kinnumpadre a gunglo
dagiti amin a bumubukaneg
kinnumadre a sindikato
dagiti amin nga agtagtagi-Leona
a ngem ta awan met ti ibati
no ti anniniwan ti ngatangata
wenno ti rurog ti balabala
ti mangyaw-awan a kasaba.
Tambangenda dagiti daniw
tapno sandianda dagitoy
iti prosa ti nalaylay a baraniw
nga iti pannakaulaw
ket masapul a magelgel
iselsel kadagiti amin nga abut
ti kawaw nga utek
ti buttabuttaw nga isip
ti ngiwat nga agbusi iti linalaglag
tapno iti panangipapel
kadagiti bukod a balikas
a kaarngi dagiti ikotda a malas
ket ti panagungar ti daniw
iti sirmata dagiti naanus nga ayat.
A ngem ta saan a makikamalala daytoy nga ayat
saan a mapnek iti nagal-alusan a pammateg
wenno tedtedda dagiti suka ken atang
wenno pammarakubaken a marunggay
weeno a ti ayamuon ken insaldan iti kaibaan
nga iti rabii ket kaludon ti anglem
masindian daytoy a pangsukal
iti kuriro dagiti bangkarote
a panangimameg ti kalaingan kano a Bukaneg.
Naganantayo dagitoy a bulbullagaw:
isuda dagiti putot
dagiti impotente a mannaniw
kadagiti prosa ti baraniw
a no agdaniw ket bangbangir
ket iti parparawpaw dagiti busi
isuda dagiti adda kadagiti panid
nga iti umras dagiti matay a kararua
ti umiso koma a balikas
pasiamanda a nobenaan
ti mangwaksi a kinamalas
iti siam-nga-aldaw a kararag
isuda a no agngirsi
ket ti agrungrungiit a panid ti durgi
sadiay ti adipen ti nagalusan a darang
a nakaruk-at iti karsel ti katay ken liway
tapno manen, iti panagtambangda
iti daniw ket ti sabali nga allilaw.
Agtambangda iti daniw
sada ngurungoren ti tengnged
ti pangngarig. Ipatedtedda ti dara
iti isipda a balitungeg.
Agtartarubong daytoy kadagiti amin
a kita ti panagketong ti isip:
napipia laeng a pangsapsapo
iti agkuykuyegyeg a bagbagis.
Ngarud, ita, pagungarentayo
dagiti prosa ti baraniw.
Iti kasta, iti pananggelgel iti daytoy
maalaw a puot, masukal ti kaarngi ti ulbod.
A Solver Agcaoili
Hon, HI/Abr 25/09
No comments:
Post a Comment