Naladingit ti katawami,
kakaen a mannaniw.
Ipagpagapum koma daytoy a daniw
a kas sungbat ita,
iti Jueves Santo ti panagduadua
a Jueves Santo met ti eukaristia
dagiti baro a namnama.
Rugiak ngarud daytoy a sungbat
iti sapay koma ket leppasek
met laeng iti kastoy
tapno iti basikaw ti saludsod
ken sungbat
ket ti basikaw ti pammadso
ken ti panagungar.
Apagapaman a mabasami,
kakaen a mannaniw, ti surat
Apagapaman nga immukuok kadakami
ti antigo a liday nga ita piman ket kaatag,
nagkatawakami, naulimek a katawa
katawa ti umel a sentimiento
katawa nga ubbaw.
Aminenmi ita ti pasamak:
nagisemkami iti bangbangir
sa idi kuan ti pannakalagip
nga ita nga aldaw
ti pammadso kadagiti
markado a mannaniw!
Padsuen isuda dagiti nalalaing
nga agugas kadagiti im-imada:
sabon a nabanglo nga umuna,
daytay addaan iti jasmin
wenno aloe vera wenno balsam
daytay addaan iti pangontra
iti mikrobio tapno malabanan
dagiti bakteria iti Pedro Bukanegan
tapno ti tamay ti angin
ket saan a maitayab tapno
agbirok kadagiti mannaniw.
Ta isu daytoy:
agkamtud a langit ti Hawai'i
ta no mangted iti bendision
ket tedtedda laeng para kadagiti babassit
a kapada nga an-anaken
dagiti lua a barbangisit
buteg iti kuelio a nadulpet.
Sumaruno ti agua bendita,
ti danum iti Santa Romana
ti danum dagiti danum nga iti saggak
ti mannaniw a miron ket ti nana ti pluma
a sangamalukong!
Ituyagna paan-anawa a mannaniw
ti ared-ed ti agua bendita
tapno isapsapo kadagiti ramay
sa iti agpipikel a pispis,
sa iti agmamayo a pungupunguan
tapno ita a Viernes Santo ti Pammadso
ket bay-an nga agkonsierto
ti lansa ken martilio.
Agugas, siempre, iti ima
ti diakono a mannaniw ti pamarpardaya
diakono dagiti sinampadi
a ministro dagiti daniw a sawiri.
Lagipen ti salmo dagiti panangadipen
ket iti tokar ti parayag nga adda iti isip
ket ti anunsio ti pannakaikkat
kadagiti basol iti pluma
nga iti libro ti lagip ket naikur-it.
Ngem agnanayon daytoy
kas iti kinaagnanayon a panagayus
ti danum iti man barukong ti langit
iti malmalday nga agmatuon
wenno iti alas-tres ti pammadso
ti ganggandiong a mannaniw
a dagiti versikulo ket kapon.
Rugianna, kalpasanna,
ti kapitolo dagiti sariugma ti panagbuggo
idinto a ti ramay ket agar-aruyot
iti nariper a danum ti pammadso.
Gandatenna nga alaen ti panio
a puraw a kadagiti ramay
pannakaiyannatup adayo unay.
Agdeklara ti panio iti wayawaya:
sika a mannnaniw nga agindadaniw
sika a salamangka kadagiti nalaad a gasat
sika nga inauna dagiti amin a parbo
nagan man wenno pakabuklan ti impierno
sika a mannanao kadagiti kinabangsit:
idiannak!
Panawannak!
Adaywannak!
Sika a prinsipe dagiti sipnget
sika ti Viernes Santo a kaariek.
Kuna ti kakaen a mannaniw:
Ngem ta mabitaytayonto amin
iti Viernes Santo ditoy Honolulu
idiay Ilocos, iti Amianan
kadagiti amin a sulinek ti lubong
a ti pagsasao ket ibilbilang.
Padsuennatayonto ti kalaingan.
Padsuennatayonto
ti nakapagugas
iti ima,
ti kadalusan dagiti amin a nadalus
ti nagsabon kadagiti amin a nagsabon
ti nagpunas iti panio dagiti panagtutuok.
Sungbatak ti surat iti daniw.
Iti pangngarig dagiti paripirip
ket ti mangisalakan a sagawisiw.
A Solver Agcaoili
Hon, HI/Maundy Thursday
Abr 9/09
No comments:
Post a Comment