Misterio Pascual Uno ti Literatura Ilokana:
Makedngan a Matay.
Kedngan a matay dagiti nalalaing a mannaniw
Kedngan a matay dagiti Poncio Pilato ti literatura
Iti ili ken iti ballasiw-taaw
Isuda a Fariseo kadagiti amin a kinalinteg
Kadagiti amin a pamilawan
Kadagiti amin a panangidadanes
Kadagiti mannurat a di adipen
Wenno di umagek kadagiti kawaw a muging
Ti ari dagiti aweng, ti agin-aaribai a laing.
Misterio Pascual Dos ti Literatura Ilokana:
Maited ti Krusna.
Ited dagiti makaammo iti amin a pagimbagan
Ited dagiti panglakayen a dagiti isip
Ket pinakabawen ti panagam-amangaw.
Misterio Pascual Tres ti Literatura Ilokana:
Maidaramudom iti Umuna a Gundaway.
Iduron dagiti henio, saplitanda iti latigo
Ken iti basnot ti sao a di mangiginggina.
Misterio Pascual Cuatro ti Literatura Ilokana:
Masabatna ti Inana.
Ay-ayen ti ina dagiti lagip
Ti mudia kas iti mutia
Ket anian ta dagiti lua ket para iti panagsagaba.
Misterio Pascual Cinco ti Literatura Ilokana:
Tulongan ti Manangngaasi a Mannurat.
Ngem ta pumanaw met ti karadkad iti lasag.
Kasano a bagkatenna ti babantot
Dagiti amin a pannakaitublak
Agraman dagiti panangirurumen
Dagiti autoridad ti ublag?
Misterio Pascual Seis ti Literatura Ilokana:
Punasan ti Babai ti Rupa ti Literatura.
Alaen ti babai ti balabalna
Alaen ti babai ti dalungdongna
Sana wadaan ti rupa ti literatura
Iti paratong dagiti dara, lua, ling-et, bilok
Ken aminen a kurenren ti panagsagaba
Panagibtur manipud iti saplit
Dagiti nalalaing, dagiti kalaingan
Dagiti agukkor iti medalia a balitok
Tapno iti sileng ti dayaw
Ilupitlupitda amin a kabusor.
Misterio Pascual Siete ti Literatura Ilokana:
Maidaramudom iti Maikadua a Gundaway.
Manen, agsuek ti literatura iti tapok
Ket iti linabag dagiti daniw
Ket ti panagdir-i dagiti pangngarig
A bagi ken dara ti ulbod!
Misterio Pascual Ocho ti Literatura Ilokana:
Masabet ti Literatura Dagiti Mannurat.
Masabet ti literatura dagiti agkabannuag
A mannurat, dagiti ub-ubbing a mannaniw
A kadagiti pingping ti Langit
Kadagiti askaw ti pul-oy
Kadagiti pammagbaga dagiti natakneng
Ditoyda nga agsakdo iti makapabang-ar
A kananakem maipapan iti panagdayas
Iti dunor, panagpalaing iti dunggiar
Tapno iti kangitingitan ti rabii
Ket madanonan ti panangawat
Iti komulgar kadagiti basbas ti puli
Nga iti literatura ket rumbeng nga iyaklili.
Misterio Pascual Nueve ti Literatura Ilokana:
Maidaramudom iti Maikatlo a Gundaway.
Iti maikatlo a gundaway maidaleb ti literatura.
Iduron dagiti aginmamannaniw
Tabbaawanda, pagsawsaw-anda
Iti lengguahe dagiti mangaskasaba
A balikas ti pannakimalala
Kadagiti dingguen, kadagiti saran
Kadagiti agmanto a kur-itan
Ni kinaay-ay-ay: Kugtaranda ti literatura
Nga iti tapok naipasubsob
Tapno iti kada kugtar lumtuad
Ti laing dagiti impostor a mannurat
Kadagiti pakasaritaan ti kinadangkok
Iti balikas kas iti ritmo ti binatog
Iti rima kas iti metapora ti panaglastog.
Misterio Pascual Diez ti Literatura Ilokana:
Labusanda, ikkatanda iti pagan-anay.
Ikkatanda amin a nabati a dayaw
Ken pakaidaydayawan tapno iti sipnget
Isuda, isuda laeng, dagitoy nga agindadaniw
Isuda laeng ti mangtatao iti tallaong
Isuda laeng ken kadagiti medaliada
Isuda laeng ken dagiti sipsipat dagiti adipenda
A no agsipatda ken gumluong a kas iti gurruod
Dagiti panawen ti panagperdi, panaglayus
Panawen ti panangikipas iti amin a pintas
Tapno dagiti buyot, isuda ti agkemmel
Kadagiti amin a gabat, kadagiti sabong
Ti danum nga iti sirnaut ket korona
Ti kinadaksanggasat.
Misterio Pascual Once ti Literatura Ilokana:
Mailansa iti Krus.
Iti eskatolohia dagiti risiris
Ni ayat ket ti derrep ti estranghero
Nga ima nga iti pluma ket mangaradas.
Biroken dagitoy nga ima dagiti lansa
Tallo para iti literatura: iti muging
Iti puso sa iti kararua
Tapno iti bangungot dagiti nangisit a tagainep
Ket ti panagari dagiti agarsab a rikna
Dagiti lam-og iti pammigbig
Dagiti nangaramid iti literatura a pagbagasan
Iti dayaw man wenno iti pirak
Tapno iti pammigbig ti kaaduan
Mabukodan, matagikua,
Ikaranukon nga idulin iti bariwangwang.
Misterio Pascual Doce ti Literatura Ilokana:
Mapadso, sa Matay.
Mapaksuyan ti literatura,
Panawan dagiti regta nga adda kadagiti balikas
Kadagiti sariugma dagiti darikmat
Nga iti agnanayon ket mangliblib-at
Tapno ti inana pumanaw
Iti simbeng dagiti palpalakpak
Dagiti ari, dagiti naari, dagiti agin-aari
Kadagiti nainliteraturaan nga ayat.
Misterio Pascual Trece ti Literatura Ilokana:
Maikkat iti Pannakailansa.
Mabuyatayo ita: maysamaysa nga ikkaten
Ti lansa iti pannakaipalok dagitoy kadagiti linabag
Kadagiti sarita, salaysay
Kadagiti tularamid a nagideklaran iti Wayawaya.
Ibaba dagiti agkabannuag a mannurat
Ti literatura, ibabada manipud iti krus
Ket tapno ti sugat punasanda
Tapno ti dara ket ukkonenda
Ipanda kadagiti burnay
Takkubanda daytoy iti binakol
Tapno ti kaputotan nga umay
Aklonenda ti kapay-an
Datonanda ti literatura a pimmusay
Iti lagip, sa iti saguday a mangted murmuray
Panagriing manipud iti pannakatay.
Misterio Pascual Catorce ti Literatura Ilokana:
Maitabon, maidulin iti tanem dagiti aweng
Ti pagsasao. Maitabon tapno iti kinaunday
Ti rabii ket ti panagbukar dagiti busel
Ti panagsampaga dagiti sabong
Ti pannakigantilda kadagiti linnaaw
Iti ungto dagiti nabiag a bulong.
Misterio Pascual Quince ti Literatura Ilokana:
Agungar, agideklara, agiwaragawag
Iti irurut-ak iti karsel ni patay.
Agungar ti literatura iti lukong ti ima
Dagiti agkabannuag a mannurat
Saan kadagiti barukong
Dagiti duduogan a kinamaag.
Adu ti basol dagiti henerasion
Iti immuna kas iti agdama
Ket dagiti agkabannuag a mannurat
Agsursuroda kadagiti allawig
Kadagiti amin a bagio ken didigra
Kadagiti linabag ti isip a mangrikrikna
Natakneng ken agrespeto iti lagip
Mangparpatuat iti pakasaritaan ti saririt
Kas iti rag-o kadagiti sao a sukal
Iti agindadaniw a balangkantis.
Ket ti mudia ti maaradas a sabong
Sadiay, iti makabiag a basikaw
Dagiti makerker a pintas
Dagiti agungar a balikas,
Dagiti darepdep nga aglibas
Iti tanem dagiti sao ti balasubas
Sadiay, sadiay, sadiay a mabirokan ti kappia
Kadagiti ubing a linabag, kadagiti daniw
Nga iti kinalinteg ditoyda a maisurat
Kadagiti awanan ressat nga ayat
Ken dungngo ken panangilala
Iti awanan ressat nga agpatnag.
A Solver Agcaoili/Hon, HI
Abril 11, 2009/Viernes Santo
No comments:
Post a Comment