Tibnok

tibnok  
ni aurelio s. agcaoili  

makibor ti lubnak, ared-ed
gabat-didaya iti panagsuek dagiti ubbing
a mannanakaw iti garakgak-siudad.
agsirko dagiti ubbing manipud iti arapaap,
salogan nga awit-awit ti sirok-bittaog,
salonan dagiti ansisit, mangimaton
inaldaw-aldaw a ganggantil
a ditoy aribai ti sirena, musa dagiti maudi
iti linnangoyan, liweng iti naputed
a sanga a katukad ti kaadalman
a pakasubokan ti tured iti pitak,
kampay-idi nga arakup iti pannakatnag,
duron ni buteng, buteng ni pannakapaay
a di pannakapadas panaglangoy, panagsuek
panaglasat iti ballasiw a ditoy nga agrana
ti sagap ken rama:
matikaw ti mariput, lumagto iti pantok,
agsuek iti danum, kumaradap iti lansad.

agsala dagiti aragan iti kada kusay
mairarem a lumung-aw iti sidong ti apres
a binalud ti bubo, kamang
dagiti an-annak
a maallilaw iti ragsak.

Agbaw-ing ti nagarado, bumatok, agrarem
ket matikaw dagiti ngilaw
agtayyekda nga ipuruak ti saraan
sada malned iti libeg.

iti surong, di agsarday ti apres
a mangugas iti puso ti danum
iti baba, agtibnok ti bannog, bain, ken baeng
pannakakibor ti lubnak, ared-ed

Daradara a Daniw

Daradara a Daniw

 

Kasla man sermon daytoy, pammagbaga
Iti mannaniw iti biag ken panagungar manen.

Pannakapaay iti talinaay, kunak koma,
A ngem ta binigat tay met nga agsangal
Iti arem-mata, wenno al-al, wenno sennaay.

Ania pay ngarud ita ti serserbi dagiti derrep
Kadagiti balikas a maisawang iti dulang,
Dagitay man beggang manipud iti atong,

Pagilasinan kadagiti simmina a ganggandiong,
Wenno budobudo wenno barsanga
Sadanto manen agungar kalpasan ti agmalem

A tudo wenno igaaw wenno nepnep wenno bagiw
Wenno agpatnag a gubat dagiti labidlabid,
Dagitay man kinukusit a panagkatawa

 
Dagitay man kinukusit a panagladingit
Dagitay man kinukusit a panagsapata
Iti daan a tulag manipud kadagiti pammigat

Nga ikomersioda kadagiti palengke idiay Paris
Nga ilakoda iti midnight sale idiay Los Angeles
Nga ibaratilioda idiay Santiago kasukat ti rebulto a sagrado

Nga isukmonda iti yen ken sayangguseng idiay Tokyo
Nga isukatda iti torre a danum idiay Paris
Nga isandida iti bendision ti papa idiay Roma?

Kunak man: ni mannaniw ket siririing a ladingit.
Ammona ti dolse a nasam-it, pangikkat iti pait.
Ammona ti usar ti karit, pangdalus iti rikna a kinamamait.

Ti dolse ti sinam-it, agas ti agbagtit.
Ti usar ti karit, pangugas iti biag a nabangsit.
Ti daniw ni mannaniw, aggagamer ti amin, aglalaok

A katawa ken sangsangangit
A rigat ken nam-ay
A pannakairarem ken panaglung-aw

A panagturog ken panagriing
A pannakabagsog ken panagbisin
A panagrugso ti nakem kadagiti ayat a mannakabalin

A panangay-ayam ti bileg dagiti uni nga isawang ti angin
Kas ti liday ti pimmanaw ken ti liday ti pinanawan
Kas ti rag-o ti agsubli ken ti rag-o ti masublian

Kas ti rennek ti mabsog ken ti rennek ti parapakan
Iti man gubat wenno iti pagbabakalan dagiti panunot
Iti kapatagan dagiti kappia wenno risiris

Iti man pagdayasan dagiti sugat wenno iti panawen
ti panaglaing dagiti dunggiar wenno dunor
gapu iti panagkalay-at kadagiti pantok

dagiti balikas a makaagas. Ay, wen. Ay, wen!
Ala, ala, ket gibusak pay laeng ngarud.
Kamakamek ti aldaw a pagbirokak iti suni ti ulbod

Daytay makapudno a kontrata, dinto man agsanud,
Kontrata iti arte, kontrata iti dios ti sao, kontrata iti ili
Daytay daniw a daradara, daradara a panangngaasi
Daytay daniw a kontra signos dagiti bambanti.