Aldaw ti Panagyaman

Aginnagaw ti sipnget
ken lawag iti daytoy
nga aldaw ti panagyaman.

Bay-ak nga agringgor
dagiti telepono
a no agkiriring
ket aggigiddan.

Kukuak daytoy nga aldaw
kalpasan ti panangtimplak
kadagiti balikas ti warnakan
nga idadauluan,
daytoy a dokumento
dagiti darepdep
dagiti exilo
a pakaisalakanan.

Lagipek amin
a napalabas,
kas iti isusubli
dagiti pakadanagan
iti ili nga imbati
iti panunot,
iti isusubli
ti sabali manen
a "Hello Garci!"

Nanamek ti panagmaymaysak
iti nalawa
a pantok dagiti bantay
iti isip.

Agtugawak nga umanges,
umangesak nga agtugaw
ket bay-ak
nga agsao
ti umel a plumak.

Agiyuged kadagiti saem
iti ipapanaw
agikur-it
iti sanaang
iti mapitpitutan
a panagsubli
iti purok
dagiti padaya
ti kinaubing,
iti panawen
ti isip
a di pay nagdara,
di pay nadunggiran.

Adu ngamin
ti pakakumikoman
ditoy,
kas kadagiti paulo
dagiti leddaang,
gumawgawawada
iti espasio
kadagiti nakem
a maluktan.

Adda ragsak
kadagiti padaya
ngem bay-ak a kutimek
dagiti am-ammok
itan a sennaay.

Diak kayat
ti ania man
a katawa,
diak kayat
ti ania man
a pakaikawaan
dagiti manglimlimo
a balikas, agbanniagada
kadagiti panid,
agpukawda
kadagiti kanibusanan
dagiti taraon
nga ar-artiok
dagiti manglimlimo
a dulang.

Iti Skid Row,
agtakder ti padi
a mangted iti limos:
Maysa a doliar para kenka,
Maysa a doliar
para iti pammakawan
iti basol ti pagilian
a mangdusdusa
kadagiti di tataoan.

Anian ta agpilapila
dagiti mabisin,
agdarepdepda piman
iti labon dagiti taraon
a pimpiman.

Siak, iserrak ti ridaw.
Agseggedak iti asul
a kandela,
kaduak daytoy
iti kaduak
a kasipngetan.

Panunotek dagiti paulo
dagiti panagmaymaysa,
amin a panagmaymaysa
nga awanan nagan
iti daytoy nga aldaw
ti panagyaman.


A. S. Agcaoili
Aldaw ti Panagyaman
Nob. 24, 2005
Carson, CA