MONOLOGO ITI ALDAW DAGITI BUTO

Iti likud dagiti isem ken paggaak
iti likud dagiti adu pay a panagtalakiaw
dagiti managbabain nga ar-araraw
iti naladaw a rabii
a dagiti buto
a dagiti lateg
a dagiti batillog
a dagiti lukdit
a dagiti kaper
a dagiti lusngit
ket manglanglangan iti inaldaw-aldaw a segga
ken binigat a panaguttog
iti apagmurmuray nga idda
aldaw a kaatag dagiti nagabuyo
a panagalimpatok dagiti kamkamaten
a panagal-al ti nargaan nga agsapa
iti laksid dagiti amin a panagkari
a dinto agibit
a kas pimpiman
kas iti panagsaning-i
iti pannakakugit ti buto
iti pannakakugit ti puso
iti pannakakugit ti pus-ong
aganug-og
nga agtagubba
nga agulang-ulang iti paraangan
a pakaibabainan
ti ina, manang, ikit, nanaubing, kabsat a babai,
iti dayag a pakariingan
dagiti aglunit a sugat gapu iti subukan
ken mamaen
ken gawed
ken bua
ken tupra ti lakay nga akinkukua
iti buneng a pagiwa
iti kinatao, kinalalaki, kinaasinno
iti panangrienda iti bagi nga aganug-og
a ti dana ti kinalalaki,
daytay dana a tapoktapok
ken nainlasagan
tumangken dagiti nakemtayo
datayo a tagikukua dagiti kannawid
ti panagarem iti amin panawen
ket agpatangkentayo iti tallaong
agpatangkentay iti sipgnet ken lawag
ket pukawentay ti bain, yanodtay kadagiti karayan
ken aripit ken waig dagiti gumawgawawa a sellang
awanan bain a saksi dagiti masalsalsal nga isip
ta ibardayna
dagiti amin a supot
dagiti amin a di makaammo nga agarog
dagiti amin a di mangkin-od kadagiti walang a rikna
di makarikna iti gagatel
iti lakko ti palad
a pakaurnongan ti tured
ti rugso nga adda iti makurimes
a kanito a para kadatayo laeng
iti laksid dagiti ribo a kanito ti pannakigasanggasat
kas iti pannakilumlumba iti apres ken darang
a pangidigosan
iti regget nga agkamang
kadagiti mail-ila a luppo
sadanto agpangato
iti mawaw a karabukob
iti mailiw a dila
iti agbarabara a piditpidit
iti agkutukot a tumeng
gapu iti panagtibnok ti panagbuteng
ken panangganas
iti natured a lasag man
wenno iti nakalseb a panunot,
ayna, anian!
kaskasdi ta kaskasdi
ti unnoy dagiti baredbed
ti kinabarito a kinalalaki met
a kinatakneng met laeng
datayo a buto wenno dagiti buto a datayo
datayo a lateg wenno dagiti lateg a datayo
datayo a batillog wenno dagiti batillog a datayo
datayo a lukdit wenno dagiti lukdit a datayo
datayo a lusngit wenno dagiti lusngit a datayo
datayo a lungat wenno dagiti lungat a datayo
datayo a kaper wenno dagit kaper a datayo
datayo a patpatiray-ok ti ili
datayo a paspasablog ti pagilian
datayo a salamangka ti daga a nakayanakan
datayo amin a minulmulluong dagiti poder
datayo amin nga inrurumen dagiti panangngaasi
datayo a di makasaan iti kadawyan, wen,
datayo a di masursuroan a mangiyebkas
iti balikas ti panagwaywayas
dagiti buto a nawayawayaan
dagiti lateg nga agabuyo
dagiti bukelbukel a di makaidna
uray kadagiti di maipeksa a balikas
dagiti nadakiwas a panaggagatel ti tengnged
a mangidiaya iti sabali a tengnged
datayo a wen a wen
gapu ta dayta ti kuna
dagiti ammatayo a sariwawek
dagiti ulitegtayo a barrairong a balliodong
nga agbirkog iti panaggangganas
kadagiti sipnget iti sulinek
nga agbirkog kadagiti mataog a bagas
tapno laeng maisala ti mannala a balangkantis
a suni dagiti agragut a rikna
agbirbirok iti panagpabus-oy
kadagiti walwalang a paggaak
ti sabali nga ayat
wenno sabali a panangidiaya ken ayat
iti panagkinnikinni dagiti de-kolor a silaw
iti panaggargari dagiti agek a maipalladaw
kadagiti lugar a naliday numan
pay nalabon dagiti panagngaretnget
iti sinitsaron a sennaay ti kinalalaki
nga inuugma
nga insalda dagiti duogan a pudno
nga inkitikit iti tableta dagiti pantalon,
karsonsilio, ablat, latigo, barbas,
maubon-ubon a nagan dagiti inay-ayam

Ayna, kabsat, iti aldaw dagiti butotayo,
iti aldaw dagiti lategtayo,
ipeksatay man ketdi
ti gulib dagiti antigo a babak,
dagiti basol dagiti duogan
a panagkanaig dagiti daradara a lasag
dagiti didiosen a kaing-ingas
ti kinamalalaki
dagiti rabii nga aradasentayo
met laeng dagiti lamolamo a riknatayo
tapno iti pantok dagiti balligi
dagiti naisangsangayan a derrep,
sadiay, sadiay a kunaentayo:
Daytoy, daytoy, daytoy ti kuskusto a buto!
Daytoy, daytoy, daytoy ti kuskusto a lateg!
Daytoy, daytoy, daytoy ti kuskusto a batillog!
Daytoy, daytoy, daytoy ti kuskusto a lukdit!
Daytoy, daytoy, daytoy ti kuskusto a kaper!
Daytoy, daytoy, daytoy ti kuskusto a lusngit!
Daytoy, daytoy, daytoy ti kuskusto a bukelbukel!
Martir dagitoy a buto, martir iti ganggantil.
Bannuar dagitoy a lateg, bannuar dagiti agpaparaw nga araraw.
Santo dagitoy a butillog, santo dagiti rikna nga agam-amangaw.
Presidente dagitoy a lukdit, presidente dagiti kari a kinukusit.
Diputado dagitoy a kaper, diputado dagiti pork barrel.
Senador dagitoy a lusngit, senador dagiti linteg ti attit.
Kardinal dagitoy a bukelbukel, kardinal dagiti ayat a nasukir.
Pagilian dagiti buto amin dagitoy
Pagilian dagiti buto a langgong
Pagilian dagiti buto a sansanuong.


Aurelio S. Agcaoili
Carson, CA
Nob. 26, 2005