Panagkaimaan

(Ken Manang Rose Daproza, ti mangngablon iti Waipahu)

Panagsurnad iti templo
ti balikas ti rinantak
iti ibibisita iti taeng.

Katulagko ti mannurat, planuen
dagiti sumuno a paulo ti suraten
a daniw wenno rinnanggas.
Saan nga ammo dagiti matiktikaw
a mannaniw ti ti estoria
a madagdagullit:
ti panangpadarada, kas pagarigan
iti balikas. Ti panangrukrokda
iti sirmata kas iti panangikipas
iti kurrarayan a mayatang
iti diosen ti kur-itan a mangipugto
kadagiti rikna nga agsiuman,
kas ita nga ipalagip ti ut-ot
iti saka ti gatad ti yaadayo,
sandi dagiti tagainep a narigat
a matukmaan iti ili nga ipatpateg
ngem di met dina met ammo ti agayat.
Iti naggapuan, narigat pay ketdin
a sangalen ti rugso
nga addaan iti maris
wenno balabala
wenno 'tay adigi a maipalok
iti daga tapno masukal ti bagyo
wenno ti layus wenno ti nadangkok nga angin
a no sumro ket mangiwasiwas
kadagiti panungpalan ti tured.

Aganikkika nga umaddang
kadagiti maikur-it a linabag
kas iti panaganikkim gapu
iti naut-ot a yaaddang.

Malagipmo idi suratem ti umuna a daniwmo
ket mangrugin ti seremonia ti ablon:
agas ti Intsik, kuna ti mangngablon,
regalo ti doktora a pagayam
a makaammo iti dagsen dagiti imak.

Surotek, kunana, sapulek ti rugi
dagiti rittuok dagiti tulang,
ti kamaudianan ti rinat
ket sadiay a paksiaten ti nagan
ti bullo. Ipulagidna ti lana
ket dagiti ramay a maammo iti rigat
birokenda ti puon dagiti nam-ay
wenno pannakapabang-ar.
Ibulsak dagiti agsisilpo
a saning-i a diak yebkas.
Iti law-ang, sadiay a biroken
dagiti amin nga ansisit
wenno mangmangkik
wenno anghel ket agpakaasiak,
agpakaasiak: Ruk-atandak iti daytoy a karsel!

Saan a nalpas ti ritual
iti maysa laeng a puligad ti lana.
Maulit-ulit ti panagsagaba
kadagiti ut-ot a sumellang,
agtaray-buatitda a mapan iti pispis,
sa iti piditpidit, sa iti pulso,
sa iti pungupunguan agingga
a maam-ammom ti langa ni patay.
Sirmataem ti birtud ti lana.

Iti sumuno a bigat,
lagipem ti panagsangim
samonto ikatawa ti ritual
ti napalabas a rabii.

Kautem ti bulsam. Perrengem
ti mangngablon ket sadiay
a mayallatiw kenka ti panaglaing.
Alaem ti binting ti doliar
ket ti agila mapan iti ima
sa iti altar ti mangngagas.



A Solver Agcaoili
UH Manoa, Feb 13/07