Sabado ti pannakablo ti saka
kas iti pannakadidigrak iti pagpaggaak.
Sabado met ti panagsagkisagking
ti nakem kas panangiginggina
iti saem. Sumarut ti ut-ot manipud
iti tangan agingga iti kaunggan
a kas panangsarut ti barsanga
iti daga ti Magic Island
a nakapadsuan ti regta.
Kaniak nga immay ti bola
ket sarapaek koma, itag-ay
ti balligi iti pakaikamengan
a grupo dagiti agtalakias a katawa,
siak, kas panangiliwliwagko iti isip
a ditoy ket adda koma ti inaudi,
kagingginnantil ti angin iti sadiwa
a baybay iti daytoy
a malem a no agpakada
ket risutenna ti karit dagiti allon
nga agsabuag kadagiti batbato
a ditoy, iti akikid a sabangan, ditoy
nga inyanud dagiti narungsot a danum
di ugma. Wenno binagkat ngata
dagiti dumadangadang tapno sagutanda
ti panguloda iti pabuya
manipud kadagiti eksena ti angin:
agsala dagiti bulong
iti tadek ti agamatuon?
Insarapak ti sakak.
Nagkukot ti daga a madangran
iti panagkanalbaag.
Abaga iti abaga,
lasag ken tulang
iti tangken ti uniberso a kasla kapas.
Marinat ti urat ken aminen a pigsa
ket kas iti bileg ti subukan
agtamedak a sisiak.
Mablo dagiti rikna
kas iti pannakablo ti ragragsak,
ibati iti parke ti linglingay
a rabrabak.
Iti rabii dagiti gitebgiteb,
agbirokak iti ablon ni ayat,
daytay man nasamay nga ilot
ti panagagas kadagiti lagip a madunggiaran
wenno panunot a mapiglatan.
Sapsapuak ti limteg a bullo
iti katay, pakrus nga orasionak
iti amin nga araraw ti soltero a kinasiak.
Iti adayo ti kamangko:
iti walang dagiti panaas
a mariknam iti agpatnag.
A Solver Agcaoili
UH Manoa/Feb 10. 2007
No comments:
Post a Comment