Panaglugay iti Gumil Hawai`i

KABLAAW

Maysa a pakaidayawan ti mangkablaaw iti GUMIL Hawai`i iti panangselebrarna manen iti anibersario ti pannakaipundarna. Iti nagan ti Ilokano and Philippine Drama and Film Program iti Unibersidad ti Hawai`i iti Manoa, impapusuan ken sibubukel ti panaglugaymi kadagiti amin a kamkameng ken opisial ken pundador iti daytoy a gunglo a kalpasan ti nasurok a tallo a dekada a panagserbina iti komunidad dagiti mannurat nga Ilokano ken taga-Amianan ket naayat latta a mangkibkibin iti kultura, kannawid, ken kananakem ni Ilokano ken amin a taga-Amianan iti man Kailokuan ken Amianan nga am-ammotayo a lugar a pisikal ken territorial wenno iti Kailokuan ken Amianan nga adda iti puso, kararua, panunot, lagip, ken kaririknatayo nangruna kadatayo a pimmanaw tapno agsubli iti sabali ken naisangsangayan nga Ilokos ken Amianan a masalamaantayo kadagiti tantanap ken disdissuor ken bambantay ken bannawag ken sardam nga adda iti lengguahe ken kulturatayo. Ta kastoy ti kaipapanan ken anag ti gunglo ti panagsuratan nga iti nabayagen a panawen ket insursuro kadatayo ti GUMIL Hawai`i: ti naimpartuatan a pananglagip, ti panangidaton iti biag iti dayta a lagip, ken ti panangilala iti dayta a lagip babaen kadagiti sursuraten dagiti mannurat a naynay a makigingginnantil iti inaldaw-aldaw a biag, iti inaldaw-aladaw a padas.

Ti muhon nga akem ti GUMIL Hawai`i kadagiti naglabas a tawen agingga iti agdama ket ti panagbalinna nga extraordinario a testigo ti Literatura Ilokana ken Literatura Amianan, maysa a kita ti panagtestigo a naisalsalumina gapu ta awan ngatan ti makaartap iti asinno man a gunglo dagiti mannurat nga Ilokano no ti pagibasaran ket ti kaadu dagiti produksion a literario—ti kakaisuna a kongkreto nga ebidensia no ti maysa a gunglo dagiti mannurat ket addaan iti sinseridad iti panangitungpalna iti gapu ti pannakabuangayna. Ta ti akem ni mannurat ket agsurat: ti mangisurat kadagiti kapipintasan a kapampanunotan maipapan iti kinaasinno, maipapan iti padas ti tao, maipapan iti uniberso. Saan nga akem ni mannurat ti agtabtabbaaw wenno mangrakrakrak iti kinasagrado ti sao ta no sumaren amin nga aparato nga adda iti ima ni mannurat ket ikkaten dagiti saan unay a masinunuo, mabati ta mabati ti sao, ti mistikal a sao, ti sagrado a sao, ti nainsalamaangkaan a sao.

Kadagiti produksion ti GUMIL Hawai`i, naynay ti pannakaitandudo ti kina-Ilokano ken kinataga-Amianan. Kayatna a sawen, saan a nagkibaltang ti GH iti daytoy a sinapaataanna nga akem. Ngarud, itedmi, dakami nga agad-adal iti Literatura Ilokana ken Literatura Amianan ti kablaaw ken basbas ken kararag tapno iti kasta, kadagiti sumungad a tawen, addaan regta ken essem ken rugso ti GH a mangitandudo iti pakaseknan ti pannakapabaknang ti literatura a tinawid ken sursuraten ken suratento pay laeng dagiti mangipatpateg ken mangsirsirmata iti Kailokuan ken Amianan. Agbiag ti GUMIL Hawai`i!


Aurelio Solver Agcaoili, Ph.D.
Coordinator, IPDFP, UH Manoa
Feb 10/07