Tagiruot

1.
Palab-og ti ayat
ti tagiruot. Dina binsabinsaen
dagiti silabario ti panaguttog
a nainlangitan
a naindagaan met
a napnuan iti biag, tumangar
ta napnuan kadagiti essem
nga agragut manipud
kadagiti sibebeggang a pus-ong
wenno ti bibig nga addaan iti temtem
a saan a sumuko iti massayag
dagiti rabii a mabigatan
dagiti idda a mayaw-awan.

2.
Iti kalkalsada a nalagipko daytoy
a sima dagiti mangbanbanniit nga ayat.

Kunak iti kadua nga aglaylayag:
isuratmo iti daga
iti tapok iti danum iti panunot
iti tudo iti agsapa iti arimukamok
aramidem a permanente a lagip
iti mangliplipat kadagiti sanaang
a mailaok iti lak-amen
wenno agserbi a saem
iti inaldaw-aldaw a panangsupring
iti gasat nga adda iti palad
wenno kadagiti suni a pakaasi
ti asi nga agsiuman iti sabali pay nga asi
tapno dagiti tudo ket agsuekda
kadagiti rekkang a bengkag
a sadiay nga agsalida
dagiti amin a buteng
dagiti amin a leddaang
tapno mapasurot ti ragsak
kadagiti mail-ila nga agpatnag
agsurnad nga agtamed
tapno iti laem dagiti dios
sadiay a managanan
ti maipasngay a patpatiray-ok.


A Solver Agcaoili
UH Manoa
Feb 28/07