Padanonennak iti binigat
a panagsangalko
iti tagtagainep ni ayat.
Maysa daytoy a busel
idi damo, mangtagikua
iti ayamuom iti barukong
wenno nagan ti rugso
wenno daytay nalimed a regget
a buniagan dagiti limdo
wenno paggaak
wenno ti panagsaksi ti langit
kadagiti lua
iti blangko a papel
kas iti surat ti exilo a padak
tapno inna kunaen, inna kunaen:
lumaemka iti taeng ni padas
ket kadagiti sariugmaka
a mangrugi iti gibus
kinapusaksak.
Nalapsat a rosas
Makagargari a rosas,
kuna dagiti mabigatan nga oras
a nagguardia iti inna
panagbukar iti baet
dagiti kigaw nga angin
iti Waipahu a nangkettelak
sa iti makasinit nga init
ti Manoa a sumaranget
kadagiti pugante
a maris ti amarilio
nga adda iti tengnga
dagiti agledleddaang a petalo
sa iti sangkalikusan
ti managbabain a sabong
a mabigatan
a marabian
a panawan
a sangpetan
iti plorera ti agbungtoten
a danum.
Ita nga aldaw dagiti puso
nga agragut ken ragsak
iti lukong dagiti dakulap
iti linabag dagiti sonata ni karayo
rurog ti rosas nga amarilio.
Kas iti dati a berde a bulong,
malaylay ti sagut a lailom.
A S Agcaoili
Peb 15/07 UH Manoa
No comments:
Post a Comment