Dara ti Kurrarayan

(Pakauna a Palawag:
Impatulod ti dati nga adalak iti seminario daytoy a daniw, maysa nga adalan a nabayagen a di nakita: agarup 15 a tawen ngata wenno nasursurok pay. Numan pay masirmatak daydi nga agtutubo, diakon ammo ti langana ita ta kunana ket naestaduan kanon ken addaanen iti dua a putot nga agpada a mangtawid iti apiliedona, segun iti e-mailna kaniak ita nga aldaw, ti kaunnaan nga e-mailna iti las-ud ti dayta a tawen a di panagkita. Ngem sursurotenka iti pappapaman, kinunana pay: manipud iti Tarrance, California, sa ditan Hawaii, sa iti Nakem, sa IAS.

Awan ngatan ti makasagid iti rikna no di daytay pananglagip mismo ti adalan kadagiti babassit-usit a kinaimbag (saanen a lagipen ti kinarungsot iti klase ken ti kina-terror ta kasta ngarud ti awagda kadakami no kasta nga adu ti paubrami) ti maysa a nanumo a manursuro nga agar-arapaap nga adda maisurona.

Gapu ta agsubli dagitoy nga adalan--kas iti panagsubli kaniak ni Florentino Lorenzana wenno Ka Loren, ipatok lattan nga adda bassit naibatik iti panunotda ket daytan ti pamkuatak nga agyaman. Dinaniwannak pay ti adalan--ket iburayko ngarud daytoy a daniw a nakariknaak iti ray-a, rag-o, ragsak. Agyamanak unay, Ka Loren.)


Dara ti Kurrarayan

(para kenni Dr. Aurelio S. Agcaoili)

Ala agwarsika iti bagas.
Iramanmo pay dagiti ibu ken itta
Kasta met dagiti batbato a naiwawa.
Dita ruangan, didiay tawa,
Uray didiay paraangan
Ken idiay Malakaniang.

Ditoy bukot, duri, ken dapan
Iridismo dagiti pagbuniag nga asin.
Itanamitimmo dagiti arasaas
A naadalmo diay Anggaki.

Iparabawmo dagiti liningta
Nga itlog kadagiti ungot.
Dimo liplipatan ti anglem
A barabad ti sugat.

Iti panagatang ket ti panangiyayab:
“Ay, maykan! Ay, maykan!”

Maibitin dagiti lagip a masukdal,
Mairikus kadagiti bantay ken kadan-aran
Ket maiparakupok ti dara ti kurrarayan.

Maipupok ti buok iti alipuspos
Ngem, rumkuas dagiti gapu:
Iti baba ti alipuspos ket ti ranget
A maulit-ulit, di agressat
Uray iti agsipnget.

Adda diskurso iti angin
Ket wen, ti kurrarayan
Ti umuna a maidadanes.


Florentino B. Lorenzana
Becques, Tagudin, Ilocos Sur

2 comments:

FBLorenzana said...

nasarakan ka manen, sir. apo ta inpostem pay met tay daniwko. agyamanak. agkitatanto inton addan naitulongko kadagita gannuat tayo. "Agtalinaed latta ti ranget ditoy baba ti alipuspos!! Maikasa latta dagiti pluma a maiturong kadagiti linumoten a didiosen."

Ariel said...

Aloha Ka Loren:
Ti basbas dagiti anito ti adda kenka. Pakaidayawan ti pananglaglagipmo iti sirmatatayo amin.
Para iti kinalinteg, demokrasia, kinatao, panag-tao!