Kandela Iti Aruangan
Ita a disoras dagiti paniemna,
silmutanka a kandela. Ungawen
ti ar-aragaay ti lawag tapno iti pitik
ti oras ket ti panagur-uray a di agbayag.
Kas ti panangpabaaw iti maiyumras
a busi, linapet, niniugan, patupat.
Sa ti ladek nga iti rabaw ti bibingka
ket sadiay nga agpasag, pumusay
a maidasay kas iti bagi nga agpakawan
iti daga, agumbi nga agsalakan
tapno dumardaras ti panagrupsa
ti darepdep nga itan ket bangkay.
Undas kadagitoy a disoras
ti tagainep, ket iti agsala a lawag
ti kandela ti lagip kenka, inang
dagiti saning-i ken ragsak.
Kasta met kenka, kabagis nga iti maudi
nga ibit ket ti kansionmo para iti ina
nga ammom nga iti bagina a marsaak
ket ti iyaagek dagiti orkidia iti lungon
dagiti dungngo wenno panteon
dagiti ubon-ubon nga arapaap.
Bantayak a nakapasged ti kandela.
Bantayak a nakasindi iti laksid
ti puyupoy ti angin nga aggapu iti Sierra Madre.
Umay umagek kenka ti pul-oy, inang.
Umay umabrasa kenka ti bang-ar
ti angin, kabsat. Ket iti kada tedted
ti panglagip a kandela ket ti tedted ti lua
nga iti gumawgawawa a daga ket dakayo a dua.
Masurotanyo koma dagiti atang
nga iti sudi ti anges ket dakayo idi ti agidasar.
Itan ket kukuayo ti espiritu ti maiyumras.
Hon, HI/ Nov 2, 2013
No comments:
Post a Comment