Kantada ti Kailokuan

Biroken ti ili kadagiti lagip
Kadagiti kur-itan a napitutan.

Sa minanso dagitoy dagiti kolonisador
iti balikas, kas iti kannawidan.

Insandida dagiti rebulto,
nalamiis ken baed a rebulto

Rebulto ti salamangka a kadagiti dapan
wenno sangapirgis a bado

wenno iti laylayan dagiti bado
ket ti pirpir a dokumento ti milagro

a kadagiti sarita ket sadiay ti paulo,
pammaneknek tapno agbalin a santo

manipud kadagiti buteng, ila,
duadua, amin a panagibaklay

iti basol ti sabali, iti panagdawat
kadagiti amami, tallo nga ave maria

wenno gundaway a mapalikuko
tapno bumangon manen

kas iti ibabaringkuas iti kellaat
nga iti appupo ken panagkapuyo

manipud kadagiti adu a kansion
ti isu met laeng a miron

isu met laeng a nagan nga iti apagapaman
ket ti agmalmalanga a pakasaritaan.

Kas iti kolonisador, immay nagindeg
dagiti bulbulitor nga agapiliedo

iti angol, peste, nepnep, bagio, layus
ginggined sa aminen a didigra

a kadagiti sabangan ti kararua
ket ti bagi a gumawgawawa.

Dakami ti akimbagi kadagitoy:
ti dunor manipud iti saplit

ti balikas ti panagapit
nga awan met maikuribot

no dagiti kari nga agattit
agpalimos kadagiti amin a nam-ay

tapno iti sabunganay, iti tambak
ket sadiay ti baro a pannakapaay.

A Solver Agcaoili

Manoa, Hawaii/Oct 21, 2009

(Inkur-it iti oras ti paeksam iti midterm

Universidad ti Hawaii iti Manoa)

Kantada ti Kapuriketan

Mangrugi iti dayyeng, ti agalloallon
a gargari dagiti uni kadagiti kinelleng.

No agipangta dagiti barsanga
ket anian a pigerger ti billit-tuleng!

Awan danum, awan tudo, awan linnaaw
kadagiti magabay a bannawag

A kadagiti maulila a sardam
dagiti raep ket ti agur-uray a panagsakbay.

Adda kadi bisin kadagiti puriket
kadagiti ayug dagitoy a maigangal

iti babaet dagiti malmaldaang
nga agsipnget, dagiti disoras

ti grasia a kadagiti palad
ket ti mabalo a kammet?

Iti let-ang ti agur-uray a ligsay
manipud iti tengngat' rabii nga ingget' gabay

ket ti panggibus a kantada
dagiti puriket nga iti gayadan

ti pantalon dagiti rebelde nga angin
ket iti gatilio ti paltog a maigangal

santo kadagiti pettat a kanulbuong
iti umadanin nga agmatuon

sadiay ti maymaysa a kameng ti koro
ti maarusen a kansion ti rebolusion.

A Solver Agcaoili
Hon, HI/Okt 20, 2009
(Inkur-it iti panagur-uray kadagiti adalan tapno maileppasda ti midterm exam iti Philippine Pop Culture)