Dallot ti Panagkararag ken Panagpadanon

(Sinurat para iti Dumanonkayo Ceremonies, 2006 Nakem Centennial Conference, Unibersidad ti Hawai`i iti Manoa, Honolulu, HI, Nobiembre 9, 2006, ken indallot da Roxanne Taylan ken Chris Mallanao, agpada nga agad-adal iti Unibersidad ti Hawai`i-Manoa)

1. Panagkararag

Babai:
A, ta dallot ay, dalidallang
A, ta daldallot duminidallang
Agrukbabtayo iti Namarsua
Iti sidongna mapantayo kenkuana
Ta isuna ti pakabuklan
Ti amin a kaipapanan
Sumurnadtayo a pinarsua
Datayo amin a sangapada
Ta daytoy ti rumbeng
Ti nasken nga aramiden
Ti panagtamed ti iringpasen
A, ta dallot ay, dalidallang
A, ta daldallot duminidallang

Lalaki:
A, ta dallot ay, dalidallang
A, ta daldallot duminidallang
Ti nasken nga aramiden
Ti pananglagiptay aminen
Kadagiti parabur a laklak-amen
Ta amin dagitoy ket aggapu
Iti nalabon nga ayat ti Apo
Ti namartuat iti biagtayo
Ti namartuat iti kiredtayo
Ti namartuat iti piatayo
Ti namartuat iti regtatay
A, ta dallot ay, dalidallang
A, ta daldallot duminidallang




Dueto:
A, ta dallot ay, dalidallang
A. ta daldallot duminidallang
Agtamedkami ngarud kenka ita
O Apo a bubon ti kararua
Dakami nga umar-araraw
Itdemkadakam ti rayray ti aldaw
Itdemkadakam ti bang-ar ti puso
Itdemkadakam ti lung-aw iti appupo
Itdemkadakam ti lag-an iti babantot
Itdemkadakam ti dur-as iti saklot
Tapno iti kasta ket malak-ammi ti daton
Nga inrantam kadakami a tallaong
A, ta dallot ay, dalidallang
A, ta daldallot duminidallang


2. Panagpadanon

Babai:
A, ta dallot ay, duminidallang
A, ta daldallot duminidallang
Kasta met nga inkam kablaawan
Dagiti amin a nagsangpet a pagayam
Gagayyem a mabigbig iti sabali nga ili
Madaydayaw ken malalaki
Dagiti dayag a nalalaing
Dagiti bisitami a nasanting
Amin dagitoy a kakaduami
Iti daytoy a taripnongmi
Ta dakkel a pakaidayawanmi
Ti pannakikammaysayo kadakami
Pannakikammaysa a pakalaglagipanmi
Pannakikammaysa a pakautanganmi
Pakautanganmi iti naimbag a nakem
A bayadenmi met iti naimbag a nakem
A, ta dallot, ay dalidallang
A, ta daldallot, duminidallang


Lalaki:
A, ta dallot, ay duminidallang
A, ta daldallot duminidallang
Dumanonkayo ngarud, apo
Sumrekkayo iti tallaongtayo
Kaduaendakami iti daytoy nga aramid
Rambakantayo daytoy a patawid
Ta daytoy a patawid ti bendision
Ta pakaigapuan daytoy a punsion
Daytoy a panagkakamammayet
Pannakaur-urnos ti kinasingpet
Panangisagut met iti sayaat
A kasingin ti pudno nga ayat
Ti ayat a nasudi ken natarnaw
Nga imulatay iti ballasiw-taaw
Tapno gibusantay ti pananglipat
Kandado ti lagip makeltat
A, ta dallot, ay dalidallang
A, ta daldallot dumininidallang

Dueto:
A, ta dallot ay dalidallang
A, ta daldallot duminidallang
Itedmin ngarud kadakayo amin
Ti panagtamedmi iti laing
Ti panangbigbigmi iti kananakem
Nakaim-imbag a kababalin
Amin dagitoy nga insangpetyo
Awatenmi amin a sipupuso
Sinanama iti panangipategyo
Dumanonkayo ngarud, apo,
Sumaklangkayo amin iti numo
Dispensarenyo ti nagtenganyo
Ta ti barukongmi ti sangladanyo
Ditoykayo a lumaem ken agindeg
Iti barukongmi ti subad a pammateg
Ti panagyaman a madagdagullit
Ti panagisem a nakasamsam-it
A, ta dallot, ay dalidallang
A, daldallot, duminidallang.

A Solver Agcaoili
UH Manoa, Nob 2/06

4 comments:

abril said...

wow, mang ariel, very creative ti inaramidmo nga opening ken closing ceremony (dallot style) ta nakem conference, kasta koma met ti mapasamak no adda gumil conference. showcase pay ti kulturatayo nga ilokano.

Ariel said...

padpadasek a pabaruen ti kannawidantayo ket bay-ak nga agbalikas--a baliksenna--ti kananakemtayo. Nagganasak man a nangsursuro kadagiti ubbingmi tapno maidallotda daytoy. Uray la a rimrimmuar ti urat ti tengngedko idi rabii. Ngem kunam, ammok met gayam ti agdallot, sika! Itatta laeng a naammuak a kabaelak met gayam. Ken kasla man laeng paimula dagiti balikas ken dagiti ayug iti likod dagiti balikas. Nagubingak ngamin a nakangkangngeg iti dallot. Uray ti kabibiag ni Lam-ang ken dinaldallotda iti ubingak idiay Laoag. Mustakan?

rva said...

nagsayaat koman no nakadar-aykami met tapno agnakemkami koma metten. kangrunaanna tapno naimdenganmi koma man piman ti panagdallotmo, manong!

Ariel said...

Aloha Roy:
Kunam sa! Adu dagiti umay. Ni Ka Joel ket umay makiinnabrasa ken agideliber iti papelna.