Ti Aldaw Dagiti Napasag a Pabo

1.
Imbati dagiti peregrino
a pakalaglagipan
daytoy panagngurungor

iti pabo wenno panangdutdot
aginggana a ti timek daytoy
ket agallangugan kadagiti bakras

ken rangrangkis dagiti tagainep
dagiti isu amin
nga agkatangkatang

kas kadakami amin
nga exilo ita
nga aldaw ti panagyaman.

2.
Maikapatkon a tawen ditoy
a disso ti panangmalmalanga
iti sango ti tinurbo a pabo

a nagbagis kadagiti amin a kita
ti maisakmol nga ibit, ila, kawa
daytoy a makan nga iti laeng

komedor dagiti babaknang ti ili
ti pakasarakan, butiakanda piman
ti boksit, sadanto salaan iti kaniaw

wenno ti tadek a pakasalamaan ti regget
kas iti pannakasalama piman
kadagiti agragut a mangmangkik

ken agpuerong a di katatawan
no maribngas kenka ti gasat
a sinsinan ken agimut

dagiti duogan nga orasion
daytay panangdawat iti panagdegdeg
koma ti apo iti maminsan pay a tig-ab:

kas daytay aggapu iti mansanas
a nalabaga, kurabkuraban a prutas
ni laing a kamaris ti dara

ginalon a dara manipud kadagiti gerra
kadagiti bala ken kanion dagiti merkader
ni patay ken wayawaya ken demokrasia

sibibiag a dara kontra sibibiag a dara
umang-anges a lasag kontra umang-anges a lasag
umis-isem a rungiit kontra umis-isem a rungiit

idinto nga irakrakurak met
ti maminribu a pammunpon
ti ebanghelio ti pannakaisalakan

kadagiti amin a kita ti limlimo
iti man anniniwan nga agawan
agpasugnod iti nagpanes a lawag

wenno agbati kadagiti sellang
ti bigat a manglanglangan
maulila kalpasan ti ritual

ti panaginraragsak ken panaginkakatawa
iti aldaw dagiti pabo nga arkos
ti maidiaya a pangrabii

dagiti estranghero a balabala
dagiti prinsipe ti ili a di agyaman
isuda nga ama ni kinapimpiman.

3.
Ditay met ngamin makasursuro:
pang-aw a sao laeng
ti ibalestayo, kawaw a balikas

ti sungbat kadagiti kinaranggastay
iti lalaem dagiti maidasar
nga ilado a pabo a nginurungor

ti kinamanagimbubukod dagiti kutsilio
bendision kampay-idi kadagiti malak-am ita
gulib kadagiti maidiaya a kanginaan a pino

datayo amin a sibubussog a di met nabsog
datayo amin a malmaltotan a di met simmubo
datayo amin nga agtultulakak a di met nakiranod

idinto ta iti sabali a suli
iti padaya dagiti isu amin
a mapadpaidaman a kakailian

agyamanda iti nalabon a kinakisang
urnongenda dagiti maregmegtayo
yatangda iti altar ti lua nga awanan salakan.



A Solver Agcaoili
Honolulu, HI
Iti aldaw ti panagyaman, Nob. 24, 2006, UH Manoa

No comments: