(Daniw a panagpadanon nga imbitla ni A S Agcaoili idi Nob. 10, 2006 iti pormal a panaglukat ti 2006 Nakem Centennial Conference, Unibersidad ti Hawaii iti Manoa, Honolulu, Hawaii, a dinar-ayan dagiti gasut-gasut a delegado a naggapu iti Filipinas, Hawaii, Mainland USA, New Zealand, Japan, Australia, ken Canada.)
Dumanonkayo iti nakem, kakadua
Dakayo a kasingin dagiti sirmata
Dakayo a kamang dagiti darepdep
Dakayo a saksi daytoy a tagtagainep.
Dumanonkayo a mangimatang
Kadagitoy nalukag a parbangon
Inlilitayo a riniing iti narnek a puso
Minurmuray iti benditado a sao.
Dumanonkayo, dakayo a kadaraan
Kabunnuligmi iti panagkatangkatang
Kaduami kadagiti agpuypuyat a rabii
kabagismi kadagiti amin a panagtagibi.
Ti nakem ket panangiyinaw iti datdatlag nga ayat
Daytoy a taripnong a pannakiginnasanggasat
Pannakisinnugal kadagiti karkarna dagiti tudo
Pannakisinsinnanggol kadagiti panagmamayo
Iti man barukong wenno iti lipat iti gasut a lagip
Wenno kadagiti bannawag kadagiti an-anek-ek
Ay, wen, dumanonkayo kadagiti sardam iti sabong
Umunegkayo a lumaem kadagiti iliw iti barukong.
Dumanonkayo, ngarud, dumanonkayo
Dumanonkayo, ala, ta imatanganyo
Ti panagkakammaysa dagiti samiweng
Panagkakammayettayo manen ken manen.
Testiguantay ti panaginnala ti regta ken rugso
Ti panagkanaig natakneng nga isip iti appupo
Panagallimpatok dagiti dallot ni ayat iti sellang
Panagariangga ni derrep a maibiat iti law-ang.
Ayna, dumanonkayo ta saksiantay a maminpinsan
Panagumbi dagiti kananakem a paulo ti darang
Agpatagibi kadagiti isip a di maiwalangwalang
Agapon iti balitang ti naipasngay a kaipapanan.
Makariknakayo man iti kalamri iti panunot
Addakami ditoy a kaing-ingas ti gutigot
Sindadaanakami a mangsaranget lamiis
Mangidaton iti beggang ni gasat iti arbis.
Ditoy a yatangtayo bullalayaw dagiti pakabuklan
Ditoytayo nga aguray iti mabigatan a salakan
Tay rikna a maidaton kadagiti an-anito ti kaputotan
Tay aglipias a ragsak a gubuayen ti pinnagayam.
Dumanonkayo ngarud ta agtaklinkami
Dakami nga agpasangpet iti ila ti puli
Dakami nga agkamang iti pannakaawatyo
Iti pagkurkurangan ti exilo a kinadungngo.
A Solver Agcaoili
U ti Hawaii Manoa
Honolulu, HI
Nob 10/06
No comments:
Post a Comment