Panagkasir ti Lenned iti Bannawag

Agkasir ti lenned
ket iwarsina ti sipnget,
kas iti panagmurumor
ti mannalon
iti bunubon iti nakem ti rabii.

Agsaknap ti manto
a pagan-anay
ti agpatnag
nga agladladingit.

Miraen ti bannawag
ti bengkag
iti puso ti tao a kusit
ket sadiay,
iti labes dagiti kinelleng
ken aripit,
sadiayna a lapunosen
iti lawag
ti barukong
ti aldaw a naulpit.

Ta agbilang
ta agbilang ti lenned
kadagiti bendisionna iti kanito
ket uray ti raya
nga ipabulod ti init,
daytay mangted iti dengngep
iti pispis nga agkuykuyegyeg,
isaldana piman iti ahensia
ti naipatawid nga ayat,
antigo koma iti kinasudina
ken nasudi koma
iti kinaawan-nagan daytoy
ngem, a, ta agbilbilang met
iti supli a sagbibinting,
wenno agrag-o iti killiing
dagiti maisubli a kusing
iti appupo,
iti malmalday a lukong dagiti palad
a kinalamri ti panagkapuyo
ti mabanbannog a puso.

Agkasir ti lenned
iti bannawag,
agdawat iti agsapa
a maibayad
iti panangtagikuana
kadagiti oras
a panagisem sa panagkatawa
santo panagsasainnek
a sandi ti panagmalmalanga
kadagiti mabirdabirday
a panagmaymaysa.

Piman ti lenned
ta panawan ti bannawag,
agsubli daytoy iti arpad
dagiti makaammo iti nagan
ni manangngaasi nga ayat.




A Solver Agcaoili
UH Manoa
Nob 21/06

No comments: