Interogasion Dos Kalpasan ti Kudeta

1.
Nangina unayen ti rosas
wenno butonsilio
wenno kararag para iti sibibiag
para iti natay
para iti sibibiag a natay

a pinatayen ti biag:
aglakoda idiay Quiapo
iti rurog dagiti ar-aria
anniniwan ti kaasi
iti nagan ti ama

iti nagan ti anak.

Katibnok ti namnama ti alipugpog
agkuadrado
agsalsala
agmalmalanga
nakaparintumeng
iti rebulto ti bato

rebulto ti kayo
rebulto ti ayat nga ayat
met ti rebulto
napulagidan
pinulagidan
pagpulagidan
dagiti agmartsa

iti umuna-a-maudi
a demonstrasion
dagiti maupaan a sao
sao nga upaan
namarsua iti tagainep

linugaw a kaasi.

2.
Ania kadi ti ayug ti ladingit
a kumpasan ti panaginkukuna
ti napudno, natakneng, nasudi
a panginaen, dadaulo iti agnanayon
a panangay-ay iti ay-ay, pananglitup

iti agpang ti pudno ken saan
iti rikna, iti pakasaritaan
rikna ti pakasaritaan
ti puli, daytoy nga anak ti ranggas

daytoy nga anak ti lidem
anak ti lawag
iti sabali manen a lidem
sabali manen a sao--ti Sao?

3.
Ania kadi a katik ti marereg a limos
iti barukong ni Juan
uni ti simbeng a napaidaman
ulimek ti killiing

ti basol, basol ti killiing iti kursada
iti panangliput ti Legarda iti Forbes
iti pannakinaig ti Magsaysay
ken dalan-Malakaniang

iti panagsali ti kaing-ingas
ni Ama Macliing
iti kada patit ti ganggang ni liday
kararua ti tribu
a pinarugma
ti sinantao a bantay

arit ti inauna a wingiwing
panagbabawi a dimmanum
rinunaw ti rag-o para ken Juan
a nakamassayag?

4.
Ania kadi ti kaaarngi ti dara
daton ti buteng
bunga ti ayat iti rabii?

Ania kadi ti apros ti saning-i
dagiti mabati iti katangkatang
ti Makati a daradara
dagiti umel a testigo
partera ti isasangbay
ti ulep kadagiti nadaraan

a bulong, napasag a sabong
ti sampagita
iti nakem ti napasag met nga ubing?

Ania kadi ti dung-aw
a kanta met laeng ti kolonel
a barbasan
kaedad ti silpo-ti-riro
agur-uray iti maitabon
di makatuttutor
di mapmapnekan?

Nangina unayen ti rosas
kas araraw dagiti sibibiag.



A Solver Agcaoili
Marikina, Filipinas/Honolulu, HI
Naisurat idi 1989, gapu iti maysa a nakadardara a kudeta iti pagilian

No comments: