Ibusonko ti anghel ti pirak.
Dagiti imana adu
a kas kadagiti kasapulantayo
ken dumngeg iti lapayagna a ribo.
Ti marka iti muging makitam
ti siding ti minilion a kinakakaasi
ket daytoy nga anghel ti pirak
umay nga awit-awit
ti kuartat' leddaang
a para kadatayo a sibibiag
ken guduat' patay?
Umay a kaduana
ti rangarang ti agsapa
kadagiti emailtayo, maminsan,
mamindua, mamitlo
kadagiti kanito a kasapulantay
unay ti mangnamnama
a kabaelantay a mapanunot
iti daytoy a resesion
ti grasia:
agnervios dagiti panawentayo,
masmasnaayan a sipupudno,
ti di sigurado
iti sigurado ti karina,
daytoy nga anghel ti pirak
a ti sirmatana iti daga
nasken a maibuson
iti kada innem a tao:
innem a papagayam
a makasapul
iti maibuson a palagiptayo
kadagiti oras
nga adda pay aldaw
no dagiti rabii
masalvar tapno agpadanon
iti umuna a raya ti lawag
innem a katao
nga adda iti listaan
dagiti ing-ingungoten
estoriada ukkonentayo nga ipan
iti antolohia dagiti panaggangganas
kadagiti bambanag
a ti lugar ti pait
adda iti di ammo
a sulsuli dagiti emailtayo.
A Solver Agcaoili
Hon, HI/3-7-09
No comments:
Post a Comment