Ugasan ti kristal a tudo
ti tarumamis nga impierno
iti pantok ti kuadrado a bantay
iti tawak a kumamang iti tangatang
asul dagiti ulep
kolor-dapo dagiti panggep.
Agginggined ti kinelleng
ti pinanawak nga arapaap
iti ili a naggapuak.
Agwallages ti agbusbusor
nga angin, agsala iti kadaklan
ti naranghita a langit
santo lumaem nalidem
a balay ti agsipnget.
Sadiay dagiti bambanti.
Sadiay nga agpayangyang
dagiti agardiod nga anghel
agpawirwir tapno kadagiti payak
ket ti mamagaan a katay
ti agay-ayat nga agik-ikay:
umadayo kadagiti kassaba
ti agpagungga a himno a nasantuan
nga awanan iti paulo.
Ti oras kadagiti isla itatta: ita.
Gundaway dagiti agam-amangaw
a lua kadagiti sabangan ti Waikiki
ti bukros ti tanap iti Manoa
nga iti rabii ket aganikki:
manglatlatigo ti lagip
a kadagiti appupo makilantip
makiandingay kadagiti kugit
a putot dagiti daniw a barbangisit.
A Solver Agcaoili
Hon, HI/Mar 3/09
No comments:
Post a Comment