Aldaw dagiti pirata

The Somali pirates asked the crew members to form a line and told them to prepare to die. The pirates threatened to shoot the hostages, one by one, and throw their bodies into the sea. E. Tandoc, Inquirer, 3/3/09

Iti aldaw dagiti pirata, agleddaangka.

Adda dagitoy kadagiti ili, iti sulinek

dagiti pakaasi. Saanda a Somali laeng.

Kailian dagitoy a no agkararag

ket kalanglanga dagiti miron

wenno maton a no manggudas

dagiti darepdep ket iti kapada

nga agmirmaraut ti patibong. 

Kadagiti barko ken baybay

sadiay ti kaarngi dagiti pinanawan a liday:

mano nga aldaw-rabii a ginnubal

kadagiti pakaasi ken ar-araraw,

ti ited a bendision ti Allah

a kuna ti kabusor ken mangted liwliwa?

Sabidongam, kuna ti asawa

iti tengnga dagiti anug-og

kaawan kadagiti kanito a ti anak

ket dumawat iti pasablog.

Nagpagunggaka met koma,

sibbarutem ti paltog ket ti bala

imula kadagiti bagi a makaammo iti rigat

isuda a kapada dagitoy tawidtawid a ranggas.

Ti matmatayen a kararag ti karapet,

ibuson daytoy kadagiti angin

tapno iti idda ti anak ket sumangpet,

makiatag a makinaandingay

a mangpaksiak iti sakit!

Tallo a bulan daytoy ngem henerasion

ti pait. Siglo ti kapardas dagiti buteng

a no agapon iti puso ti bukod a nagan

agkayyapet. Alawem ti kararua

kadagiti dalluyon ket iti bangir ti danum

ket ti pagtaengam iti agmatuon.

A Solver Agcaoili

Hon, HI/Mar 2/09